Home General Aruba formando parti di un esfuerzo mundial pa cuida y conserva nos...

Aruba formando parti di un esfuerzo mundial pa cuida y conserva nos planeta

2
0
SHARE
- Advertisement -

eltonlampeEntrevista cu Elthon Lampe di Earth Hour Aruba Community Group
Luz na Museo Historico lo wordo paga awenochi durante “Earth Hour”
ORANJESTAD (AAN): Elthon Lampe ta un di e organizadornan di e asina yama “Earth Hour Aruba Community Group” cu a bin cu e tremendo iniciativa di envolve formalmente e comunidad di Aruba den e ya caba exitoso evento mundial “Earth Hour” organiza for di aña 2007 pa e Fondo Mundial pa Naturaleza (WWF). Esaki ta bay bira e di cinco aña cu WWF ta realiza “E Ora di e Planeta” caminda miyones di hende ta participando cada biaha mas den dje como un acto simbolico y cu tin e meta di crea un actitud mas conciente relaciona cu e cambio climatico y e consumo di energia na nivel global.
Durante un entrevista cu DIARIO, Elthon Lampe a laga sa cu e iniciativa a bin for di un grupo di amigo riba Facebook. Mayoria di nan a forma parti di e proyecto “Aruba 2025”.

Segun Lampe, cada un di nan individualmente a participa den Earth Hour 2010, cada un na nan cas y e aña aki nan a bin cu e idea di informa un tiki mas e pueblo di Aruba y pa participa di Earth Hour e aña aki.

Despues di esey cada un cuminza tuma contacto cu otro y a participa den diferente reunion pa wak con por a informa pueblo y e comerciantenan pa forma parti di Earth Hour 2011. E grupo, a agrega, ta consisti di 5 persona, pero tin mas hende cu ta nan tras pa yuda. Ademas di Lampe, kende ta traha den e posicion di Energy Manager na Divi Resorts, e grupo basico ta conforma pa Stanley Brown di Fundacion Aruba Conciente, tambe Urvin Leest di Fundacion Aruba Limpi, Edward Erasmus di Universidad di Aruba y Marifer Aguirre Broca, cu ta e Minister di Medio Ambiente di Parlamento Hubenil.

Elthon Lampe a enfatiza cu ta importante pa separa Earth Hour di Earth Day, cual for di añanan 70, riba April 22 ta worde celebra. Earth Hour ta algo recien.

A indica cu na aña 2007, un grupo den comunidad na Sydney Australia a dicidi cu nan kier a haci algo pa concientiza e hendenan rond di mundo pa loke ta e cambionan climatico cu nos mundo ta enfrenta.

Nan a dicidi pa paga e luznan pa un ora y di e forma aki e motivacion a cuminza pa haci algo pa e planeta. Pa 2008, 2009 y 2010 e evento a bira asina popular mundialmente. Durante di esaki diferente “landmarks”, icononan famoso manera Eiffel Toren na Francia, Empire Estate Building na New York, Coliseo na Italia, por ehemplo a forma parti di Earth Hour.

Mas y mas hende a cuminza participa y aworaki na 2011, kier pa Aruba tambe forma parti di esaki pasobra “nos ta biba na e mesun planeta y e meta di Earth Hour ta algo noble y pa nos haci algo tambe, a expresa.

Kico ta haciendo pa promove Earth Hour na Aruba? Segun Lampe, riba Facebook nan a crea e “Earth Hour Aruba Page” unda cu esnan interesa por bira fan pa asina join e proyecto.
Locual a bin ta haciendo pa e proyecto bira un tiki mas grandi ta entre otro manda carta pa comercio. Esnan cu a haya carta ta esnan cu ta forma parti di MAMBO, tambe Valero, Elmar, WEB, entre otro.

Asina a purba envolve e companianan grandi pa join e grupo y pa tambe nan paga e luznan cu no ta esencial durante Earth Hour, a señala.

E plan tabata pa EHACG por a haya permiso pa por ehemplo na Plaza Yrausquin paga tur e luznan y tene un evento, pone bela pa concientiza e hendenan cu bin. Sinembargo, tempo tabata un tiki limita ya cu tur hende tabata concentra riba temporada di carnaval, e organizador a señala.
Loke EHACG si a logra e biaha aki ta cu Gobierno, den e caso aki Minister Michelle Hooyboer-Winklaar a laga pa paga e luz di Museo Historico, conoci como Willem III Toren durante Earth Hour. E edificio aki tin dos spotlight basta grandi riba dje. Simbolicamente lo paga e luznan aki pa mustra cu Aruba tambe ta contribui pagando e luznan di un di su monumentonan.

Fuera di esey EHACG ta purbando di informa mas tanto den pueblo atravez di diferente medio di comunicacion y partiendo flyers pa asina e impacto ta mas grandi. “Si tur hende na nan cas haci algo durante Earth Hour, e impacto lo ta mas grandi”, Lampe a bisa.

Earth Hour 2011 ta tuma lugar awenochi rond mundo, entre 8:30 PM y 9:30 PM, ora local.
Corda paga e luznan cu no ta esencial na bo cas y di e forma aki bo lo por contribui cu e causa y e meta di Earth Hour, cual ta yuda conserva nos medio ambiente, reduci e consumo di energia, pero tambe alcanza un desaroyo sostenible den nos planeta.

- Advertisement -

DUNA COMENTARIO

Please enter your comment!
Please enter your name here