Home Politica Den e promer dos lunanan di 2011 Aruba a conoce un aumento...

Den e promer dos lunanan di 2011 Aruba a conoce un aumento di 3.57%

1
0
SHARE
- Advertisement -

Minister Otmar Oduber sumamente satisfecho cu resultadonan di turismo
ORANJESTAD (AAN): Cifranan di turismo pa loke ta trata februari ta conoci y ta mustrando un desaroyo positivo pa nos isla. Ya caba for di januari 2011 por a mira un crecemento di 5.2% den e total di bishitantenan cu nos isla a ricibi compara cu januari 2010. Februari ta siguiendo e trend aki di crecemento caminda cu esaki a aumenta cu 1.82% compara cu e mesun luna aña pasa. Pa loke ta e promer dos lunanan di aña 2011 por mira un crecemento significativo di 3.57%.
Minister Otmar Oduber ta indica cu e ta satisfecho cu e cifranan positivo aki, pero si ta bisa cu ainda tin hopi retonan nos dilanti pa mantene e tedencia di crecemento aki.

Venezuela, cu keto bay ta un reto a mustra un desaroyo positivo den e promer dos lunanan di 2011 compara cu 2010, esaki sigur ta algo hopi bon, pero mester sigui dune tur e atencion necesario.

Te cu na februari e total di bishitantenan for di nos pais bisiña tabata 11, 299 cu ta representa un aumento di 20.02% compara cu 2010. “E aumento aki ta un desaroyo positivo pa cu nos turismo, mas ainda teniendo na cuenta cu Venezuela ta nos di dos mercado di mas grandi”, Minister Otmar Oduber a duna di conoce.

Otro desaroyo cu mester haya e atencion debido ta e caida leve for di nos mercado principal, esta Merca. Te cu na februari por a mira un reduccion di 1.02% compara cu 2010. E caida aki ta relaciona cu e reduccion di vuelonan for di Boston. Minister Oduber ta poniendo tur e atencion necesario na e situacion aki y ya caba for di aña pasa el a bin ta reuniendo cu algun aerolinea pa atende cune.

Di otro banda mester bisa cu otro mercadonan importante pa nos isla manera Colombia ta sigui conoce un crecemento substancial caminda cu te na fin di februari por a mira un aumento di 30.34% compara cu e mesun periodo na 2010.

 Mescos por bisa di e mercado Argentino, cual ta uno den crecemento y riba cual Minister di Turismo, Transporte y Labor ta poniendo hopi atencion. E cantidad di turistanan for di e pais Suramericano aki a crece cu nada mas y nada menos cu 43.55% den e promer dos lunanan di 2011.

Mirando cu tin diferente vuelonan for di e region zuid aki cu ta yegando nos isla por bisa tambe cu otro paisnan cercano na Argentina a conoce un crecemento, manera por ehempel Chile, Peru y Ecuador cu respectivamente 240.28%, 19.80% y 50.96%.

E cifranan aki ta indica cu na e momentonan aki ta mirando un diversificacion di e mercadonan cu ta busca Aruba como destinacion turistico. Pa loke ta trata e mercado Europeo, Minister Otmar Oduber tambe ta mustra su complacencia mirando cu e cantidad di bishitantenan for di e continente aki ta sigui aumenta.

Por mira cu Hulanda a crece cu 5.49%, Reino Uni cu 17.49% y Italia cu un significante 125.16%, entre otro resultadonan positivo. E crecemento grandi cu Aruba a haya for di Italia ta debi na e vuelonan directo for di Milan cu Eden Viagi.

E mandatario a duna di conoce cu e ta sumamente satisfecho cu e resultadonan aki y cu el lo sigui traha fuertemente pa mantene e desaroyo positivo aki y mehora e resultadonan di e destinacionnan cu mester di atencion.

El a indica tambe cu awor cu ATA ta un entidad independiente e posibilidadnan di mercadeo pa nos isla por mehora substancialmente ya cu e lo por worde haci na un manera mas efectivo y eficiente.

Esaki hunto cu su maneho cu ta concentra e aña aki mas tanto riba airlift lo por trece resultadonan hopi mas positivo pa cu nos industria principal: Turismo.

- Advertisement -

DUNA COMENTARIO

Please enter your comment!
Please enter your name here