Introduccion di “Air Art” y ambiente Arubiano den Aeropuerto Internacional Reina Beatrix
ORANJESTAD (AAN): Aruba Airport Authority N.V. (AAA) recientemente a introduci su comision di AIR ART. E funcion di e comision AIR ART ta pa conseha e maneho di AAA riba e implementacion di proyectonan di arte pa obranan artistico Arubiano, dunando conseho obhetivo y como experto riba conceptonan di arte y/of exhibicionnan cu mester worde introduci na aeropuerto, tanto pa e bishitante- y empleadonan. E comision AIR ART ta un elemento esencial di e introducionn general di un toke Arubiano na aeropuerto, confrontando e pasaheronan cu un caluroso saludo of despedida Arubiano, cu ademas lo inclui e implementacion di un experiencia tropical y tipico Arubiano; un escohencia di materialnan specificamente disenja of escohi; e branding di Aruba mescos cu ATA; exposicion di productonan local y artefactonan historico hunto cu informacion di evento pa turista.
Maneho di AAA kier reconose e esfuersonan di su consehero di disenjo interior ArteSano Design Studio, kende tabata crucial ora di defini e fundamentonan di e comishon AIR ART.
E comision AIR ART ta cuadra perfectamente cu aeropuerto su ambicion pa bira un aeropuerto lider den caribe pa pasaheronan y pa bira un imagen arquitectral y cultural pa e hendenan di Aruba. E concepto ta un ‘producto’ cu orguyosamente lo por worde considera: ‘Made in Aruba’.
E vision di e comision AIR ART ta pa promove, stimula y guia e contexto di obranan artistico den AAA su areanan publico. Su meta ta parti den 3: Pa expone e diversidad y esencia di Aruba su cultura y artistanan Arubiano atrabes di arte visual, pa promove e beyeza di Aruba atrabes di obranan artistico y pa enrikese y humanisa e ambiente na aeropuerto atrabes di instalacionnan di fotografia, escultura, pintamento, film/video, ceramica y “mixed media”.
E comision AIR ART lo sigura cu artistanan local lo ta e fuente primordial pa worde tuma den consideracion y cu e artista lo traha den diferente escala y media. AAA su CEO, Sr. Peter Steinmetz tabata orguyoso pa instala cabesante Señora Claudia Ruiz-Vasquez (Design Studio ArteSano), Prof. Sr. Adi Martis (Art Curator), Sr. Ciro Abath (Consehero Artistico), Señora Myrna Jansen (Consehero di Minister di Turismo, Transporte y Labor) y Sr. Stan Kuiperi (Consehero di Cultura pa Prome Minister) como e miembronan di e comision AIR ART: “Aeropuerto ta continuamente moviendo pa dilanti, den diferente forma, y esaki ta inclui e aspecto artistico tambe di e desaroyo di aeropuerto.
Atrabes di e comishon AIR ART nos aeropuerto internacional lo worde complimenta cu arte local, mescos cu hopi otro aeropuerto grandi ta haciendo. Mi ta sigur cu tanto nos pasaheronan local como internacional lo sinti e toke artistico Arubiano cu e aeropuerto lo brinda nan!”
