Home General Polis a logra desmantela sistema nobo di Drugs Delivery Service na Aruba

Polis a logra desmantela sistema nobo di Drugs Delivery Service na Aruba

2
0
SHARE
- Advertisement -

ORANJESTAD (AAN): Oficialnan Hudicial di Cuerpo Policial, hunto cu Ministerio Publico, a sa di sigui traha na un bon forma, pa asina kibra narcotrafico riba e isla aki. A base di varios declaracionnan y tambe e observacion di e actividadnan criminal di e sospechoso identifica como A. Gonzalez, y bao guia di Fiscal Zondervan, a yega e dia 19 maart 2011 pa e inval y detencion. A invadi un cas den Lagoweg y eynan a detene siguiente sospechosonan riba orden di Ministerio Publico.
Nan a detene A.R. Gonzalez di 68 aña, naci na Aruba y biba na Cura Cabay Zuid. Tambe e muher O.A. Maduro-Amarante di 47 aña, naci na Republica Dominicana y biba na Lagoweg.
Directamente despues di e detencionnan aki, Autoridadnan a tene un razzia na un cas den Flamboyanstraat.

Den e caya aki, a bin detene e muher A.L. Gumbs-Ramirez Zabala di 46 aña, naci na Republica Dominicana. Loke Ministerio Publico a confisca den e casonan aki ta varios material di prueba valioso.

Di e sospechoso A. Gonzalez mes, nan a confisca for di un Cashi di Remedi, un caha conteniendo 10 piedra di cocaina lora den foil paper. Tambe un celular, y un Pick-up doble cabina color shinishi cu number A-18972.

For di e cas di e muher O. Madur-Amarante, a confisca un caha di palo di cigaria den cual tin un tubo di plastico oranje, y eyden tin 21 piedra chikito di cocaina lora den foil. Tambe a haya cantidad di placa larga, y varios biyete di placa. Tambe a haya foil paper y un paki di plastico di sandwich bags. Diferente celular a keda confisca.

Den cas di e sospechoso A. Gumbs-Ramirez Zabala a confisca diferente piedra garna cu ta parce substancia di cocaina y base, consistiendo di 5 pida grandi, y 79 pida chikito. Tambe un baki di plastico cu 63 foil chikito bunita corta.

Den un caha di remedi, a haya saco di plastico cu 3 pida piedra di cocaina. Tambe a haya un cartera den cual tin 3 pida bolita lora cu foil, di cual cada uno tin 3 pa 4 bolita lora aden.
Tambe un saco transparente cu den dje un substancia cu ta parecido na cocaina.
A haya aki tambe como 675 Florin, y diferente celular.

MAS DETENCION
Durante e razzia aki, a detene tambe e homber P. Ozuna de Jesus di 48 aña di Republica Dominicana, J.P. Cordero Mateo di 51 aña di Republica Dominicana. Nan a worde deteni a base di a viola ley di droga. Pero despues Sub-Fiscal a laga nan liber, debi cu no tabatin suficiente prueba contra nan.

Pero e demas sospechosonan si ta encarcela den detencion preventivo. Hasta un cumprador kende riba Diabierna 18 di Maart pa 4’or di atardi a busca droga cerca A.R. Gonzalez, a keda deteni! Polis a confisca droga cu a worde haya bon cera den su mokete. E cumprador a worde identifica como L.L. Bryson.

E siguiente dia, riba Diasabra 19 di Maart, el a worde treci dilanti y confronta cu e sospechoso A.R. Gonzalez. Aki el a identifica Gonzalez como e persona cu a bende droga un dia prome, pa e suma di 5 Florin.

Debi na esaki, e homber A.R. Gonzalez a bira masha furioso mes. E razzia a worde haci den un cooperacion estrecho di varios Departamento Policial, incluyendo cacho anti-droga. DIARIO a haya sa, cu Polis a tap telefon di e hendenan aki tambe. Varios persona cu a worde identifica den e yamadanan aki, lo worde interoga e simannan venidero ainda.

Despues di tur interogacion, hunto cu pruebanan cu tin di worde haci riba e droga, y sacamento di potret, e caso lo worde hiba pa Fiscal. Pero DIARIO a haya sa cu ya caba e sospechoso femenino A.L. Gumbs-Ramirez Zabala a bin ta admiti su envolvimento den e caso di droga aki.
E sub fiscal , Hoofdagent 1ª clase J De Windt, a termina su informa agradeciendo tur e coleganan cu a copera pa termina e investigacion exitosamente.

- Advertisement -

DUNA COMENTARIO

Please enter your comment!
Please enter your name here