Home Editorial UN CARNAVAL SPECTACULAR Y BON ORGANIZA

UN CARNAVAL SPECTACULAR Y BON ORGANIZA

0
0
SHARE
- Advertisement -

jossy_mansur_picMester cuminza pa duna SAC un elogio bon mereci, pa e forma con nan a conduci e parada cu mi a mira ayera, haciendo e fluho di carozanan y bodypiecenan asina nechi y fluido cu no por a saca otro conclusion cu tabata tin mannan profesional tras di e organizacion. Polisnan a cana sin prisa y cu hopi autoridad banda di e piezanan den movimento, percurando pa un paso libre, sin interupcion, y e publico na banda a comporta su mes manera tabata di spera di un Pueblo educa y apreciativo di loke su mesun hendenan por y a produci.

       Durante henter e parada mi no por a stop di keda maraviya cu loke e talentonan Arubiano a pone riba caya pa e deleite di nos tur. E participantenan disfraza, e musiconan cu tabata anima, e beyezanan cu tabata desfila nos dilanti, tur esey den conhunto y separa tabata asina impresionante cu tabata tin momentonan cu e beyeza puro di e disfraznan, carozanan y bodypiecenan tabata parce un parti di e cuentonan di hada y no un realidad palpante di loke nos mesun Pueblo  por y a produci. E colorido, e combinacionnan di arte y tecnica den e construccion y confeccion di e piezanan tabata realmente impresionante. Ami francamente no tabata spera un carnaval o desfile asina bunita y artistico.

        Tabata tin disfraznan. o sea bodypiecenan cu a rebasa tur expectativa, asina bon nan tabata traha. E uso di plumanan di color, piedranan decorativo y otro inventonan ingenioso cu e elaboradornan a presenta, den conhunto, tabata un espectaculo di berdad super-impresionante. Cada tema di cada grupo tabata bon elabora, di tal forma cu no tabata nada dificil pa identifica e obranan final cu e topiconan cu a inspira nan. E ingeniosidad di esnan cu a traha nan ta un ehemplo claro di loke nos mes por produci ora nos pone man na obra sin reparo na competencia o intencion di supera otronan, sino pa mustra loke nos mes por traha cu e materialnan na nos disposicion.

          Mi no ta bay singulariza ningun grupo o pieza, pasobra esunnan cu a destaca ta asina hopi cu no ta posible escoge e mihor of e mas bunita. Mi ta laga esey pa e Hueznan encarga cu e dificil tarea ey, haci riba nan mes. Mester admiti cu nan trabao ta bay ta hopi dificil, aunke nan tin den nan haber un experiencia hopi grandi cu otro carnavalnan di pasado cu tambe a luci hopi.

          Notable, entre tanto otro cos, ta e hecho cu e gruponan no a spar placa na momento di elabora nan temanan, inspira pa e idea di pone Aruba luci dilanti di e wowonan di mundo, y presenta na e turistanan cu a bin especialmente pa mira e desfilenan, algo cu nan por a disfruta enormemente y hiba back nan hogarnan den forma di potret y video cu nan lo mustra na hopi hende di nan entorno. 

           Mi mester bolbe felicita SAC en especial pa un trabao bon haci, y tur e gruponan cu a participa pa nan interes den ofrece nos y nos bishitantenan di afo un espectaculo digno di mira y disfruta. Ya e profesionalismo di e Arubiano, acopla na su talentonan nato, a alcanza un punto di perfeccion dificilmente igualable o superable aki o na otro partinan di mundo. Mi ta sigur cu e diseñonan, e arte y e gusto cu a yega nan punto culminante cu e carnaval aki (e di 57 di nos isla), lo bira hasta mas atractivo den e añanan venidero, y cu nos lo sigui mira obranan hopi colorido, perfectamente elabora, y consono cu e realidadnan cu nan ta imita den un fiesta carnavalesco di arte, musica y colornan berdaderamente impresionante.

         Un caluroso pabien na Pueblo Arubiano, tanto esnan cu a participa den e parada, como esnan cu a mire pasa for di nan acomodacionnan riba e aceranan, pa nan comportacion digno di tur berdadero Arubiano.

 

 

- Advertisement -

DUNA COMENTARIO

Please enter your comment!
Please enter your name here