Varios iglesia uni den campaña “cuarenta dia di pordon”!

Publication: Thursday, 31 March 2011. Categoria: General

Cu e meta di yega na un Aruba uni y sin odio:
ORANJESTAD (AAN) – DIARIO a acerca sr. Jouel Jansen y Roberto Gracia, kendenan ta forma parti di e grupo “40 dia di pordon”, y nan a splica kico esaki ta encera. Jansen a splica cu e meta di e campaña aki di cuarenta dia di pordon ta pa siña nos pueblo di Aruba pordona, saca cosnan di pasado pafo, y cuminza pordona otro.
Esaki lo haci un diferencia grandi den nan bida, famia, cas, etc.
Na diferente Iglesia lo bay papia di pordon, pero e campaña aki ta mas tanto den forma di propaganda na radio, prensa skirbi y television, y tin e obhetivo di siña hende kico pordon ta haci, los sentimentonan negativo for di pasado y trece un diferencia den e bida di hende.
Roberto Gracia a splica cu mayor parti di e campaña ta basa riba publidad, unda na un forma masivo ta worde fomenta pa e hendenan “pordona, pordona, pordona!” lubidando pasado.
Como ta trata di Iglesianan sin finnan lucrativo, nan ta pidi e medionan di publicidad pa aporta nan un espacio gratis, pa nan campaña di pordon.

Esaki ta un campaña cu a origina su mes na Guatemala na aña 2010, cual propaganda a worde mira pa 12 miyon di persona, di cual 51% a dicidi pa pordona algo. Gracia ta haya cu esaki ta importante pa nos Isla, pa nos sociedad, pasobra locual kier logra ta un Aruba cu ta pordona, un Aruba cu curazonnan sano, un Aruba mas uni y sin odio.

Nan a cuminza bishita barionan, diamars nan tabata na Madiki unda a conversa cu gruponan (gang) y nan a hiba nan e mensahe di pordon.

E intencion ta pa bishita schoolnan y tambe nan a acerca gobierno di cual a haya un bon aceptacion tanto di Minister Presidente como di Parlamento, y nan lo sigui reuni, pa haci un presentacion mas oficial. E campaña no ta pa papia riba religion ni Iglesia, sino riba PORDON!

Leave a Reply