Home Deporte Weganan Inter-Insular ta inicia na Aruba diabierna awor

Weganan Inter-Insular ta inicia na Aruba diabierna awor

11
0
SHARE
- Advertisement -

deport1Jacqueline Ponson –van Putten, Hefe di Deporte Escolar di IDEFRE ta informa:
ORANJESTAD (AAN)— Durante e conferencia di prensa cu a tuma lugar ayera mainta na oficinanan central di IDEFRE, Sra. Jacqueline Ponson-van Putten, Hefe di e programa Deporte Escolar, a duna un splicacion amplio ariba e proximo acontecimento importante relaciona cu Deporte Escolar cual ta trata di e Weganan Inter-Insular cu lo ta tumando lugar proximamente na Aruba, cuminsando diabierna awor. E competencianan deportivo escolar inter insular ta inicia e aña aki na Aruba e fin di siman di 11, 12 y 13 di Maart 2011.
Instituto pa Deporte, Educacion Fisico y Recreacion- IDEFRE ta organisa tur encuentro deportivo entre e schoolnan di Aruba, Boneiro y Corsou cu ta participa. E deportenan cu ta tuma lugar na Aruba ta Volleyball Enseñansa Avansa-mucha muher, Volleyball Enseñansa Basico-mucha homber y Softball Enseñansa Avansa-mucha homber. Como Aruba ta e pais anfitrion, tanto e school campeon como e school sub-campeon den cada disciplina di deporte ta participa.

Volleyball Enseñansa Basico-mucha homber:
Despues di e competencia escolar den volleyball, e school cu a titula campeon cu ta Maria School y esun sub-campeon, Commandeur Pieter Boer School ta bira e dos schoolnan cu ta representa Aruba y enfrenta e schoolnan cu ta yega pa representa Corsou y Boneiro e fin di siman aki.

Volleyball Enseñansa Avansa-mucha muher:
Den e competencia entre schoolnan di Enseñansa Avansa, e mucha muhernan di Colegio Arubano Oranjestad cu ta campeon y esnan di Colegio San Augustin cu ta sub-campeon ta bay bataya cu e schoolnan di Corsou y Boneiro respectivamente pa logra e titulo di campeon ‘Weganan Inter-Insular 2011’ den volleyball.

Softball Enseñansa Avansa-mucha homber:
Den e deporte di softball, e hobennan di EPB San Nicolaas ta campeon y Maria College MAVO ta sub-campeon. Ambos school ta haya e oportunidad pa bataya contra schoolnan di Corsou y Boneiro, mientras cu pa EPB San Nicolaas e “Weganan Inter-Insular 2011” ta un reto grandi. Esaki pa motibo cu nan ta e campeon di softball inter-insular di aña pasa y tin cu sali fuerte pa retene nan titulo.

Delegacion di Corsou y Boneiro ta yega Aruba diabierna dia 11 di Maart 2011 den oranan di mainta. Pa 11’or a.m. ta tuma lugar e reunion tecnico entre lider di tur tres delegacion, mientras cu pa 6’or p.m. tin e apertura oficial di e “Weganan Inter-Insular 2011” den sala Compleho Deportivo Frans Figaroa na Noord.

Schedule y tereno di weganan:
Pa e deporte di softball e tereno di wega ta Kudawecha Ball Park y e schoolnan di Aruba ta enfrenta otro riba diaranson dia 9 di maart 2011 pa 3’or p.m. E schedule ta continua riba diabierna dia 11 di maart 2011 pa 7’or p.m. y diasabra dia 12 di maarta 2011 pa 9’or a.m. cu e diferente encuentro entre e schoolnan.

Pa e deporte di volleyball e tereno di wega ta ambos cancha di Compleho Deportivo Frans Figaroa na Noord.
Mesora despues di e desfile di apertura ta tuma lugar e prome encuentro cu ta cuminsa pa 7’or p.m. riba diabierna dia 11 di Maart 2011. Diasabra mainta e competencia ta continua pa 10’or a.m. Riba un cancha ta hunga e schoolnan di Enseñansa Avansa mientras cu riba e otro cancha ta hunga e weganan di Enseñansa Basico.

Pa diasabra atardi tur encuentro ta finalisa y ta sigui despues cu e clausura di e “Weganan Inter-Insular 2011” na Aruba. Esaki ta pa 4’or p.m. ora cu ta entrega tur premio na e schoolnan ganador.

Weganan Inter-Insular Corsou:
E competencia Inter-Insular ta continua na isla di Corsou e fin di siman di 25, 26 y 27 di Maart 2011. E disciplina di deporte cu ta participa na Corsou ta: Futbol di Sala Enseñansa Avansa- School Campeon EPB Hato, Atletismo y Landamento. Tanto pa Atletismo como Landamento ta representa Aruba e hobennan “niet club-lid” categoria B, C y D, cu a clasifica durante e competencia escolar cu IDEFRE a organisa.

Weganan Inter-Insular Boneiro:
E competencia Inter-Insular na isla di Boneiro ta tuma lugar dianan 8, 9 y 10 di april 2011. E deportenan cu ta participa na Boneiro ta Futbol categoria B-mucha homber cu Scol Basico Waschington y Futbol categoria B-mucha muher cu Colegio Pastoor Kranwinkel.
IDEFRE ta desea tur school y nan atletanan hopi exito durante e “Weganan Inter-Insular 2011”.

- Advertisement -

DUNA COMENTARIO

Please enter your comment!
Please enter your name here