Home Hudicial Abogado a indica cu e tabata dispuesto pa bay asina leu di...

Abogado a indica cu e tabata dispuesto pa bay asina leu di yama un Huez pa bin testigua na Corte

0
0
SHARE
- Advertisement -

JudicialORANJESTAD(AAN): Diahuebs Cornelis A.v.B y Hendricus v.E a presenta dilanti di huez, debi na e hecho cu nan a wordo acusa di ta meti den asuntonan di droga y labamento di placa.
E caso a wordo yama “Mullet” y ta un caso unda cu droga tabata wordo trafica pa Hulanda, den e trolinan cu ta wordo uza pa companianan di cuminda den e avionnan.
Den e caso aki di algun aña pasa diferente persona a cay cera y a ricibi castigo caba.
Sospechoso Rodrick F.M di Corsow tambe ta un di esnan acusa den e caso aki, pero e no tabata presente.
Su abogado mr. Sulvaran si a bin Aruba for di Corsow pa represente.
For di comienzo huez a indica cu e caso lo wordo posponi, pasobra e no tabata tin tur e dossiernan di e caso aki.

El a splica cu hopi documento tabata bruha y cu tur cos mester wordo poni na ordo den un bon dossier. Abogado Sulvaran a indica na huez cu e lo kier tende algun otro testigo ainda den e caso aki, pero el a bisa tambe cu e caso aki a dura mucho tempo caba y cu e ta cansa di esaki.

Segun Sulvaran ultimo biaha cu e caso a bin dilanti, e huez anterior a bisa cu esey lo tabata ultimo biaha cu e caso lo wordo posponi y awor atrobe e caso a wordo posponi. Abogado Gabri di Hoogd a bisa huez tambe cu su cliente C.v.B kende ta biba na Hulanda y tin un negoshi eynan den cual 200 hende ta traha pe, mester a paga un ticket pa e y su casa pa bin Aruba pa e caso y awor atrobe e caso a wordo posponi.

Ambos abogado tabata tin intencion di pidi huez pa declara e caso di O.M no admisible.
Sulvaran mester a bay gara su avion bek pa Corsow y el a bisa huez cu despues di lesa e documentonan di de Hoogd cu e lo uza pa pidi huez pa declara e caso di O.M no admisible, e tambe ta di acuerdo cu e mesun peticion.

Mescos ta conta pa abogado Offringa kende tabata representa tambe H.v.E. De Hoogd a trece dilanti entre otro cu den e caso aki varios documento a wordo perdi y cu e huez anterior a bisa cu biaha pasa tabata ultimo biaha cu e caso lo wordo posponi.

E abogado a bisa cu te hasta e tabata pensa pa yama e huez anterior kende ya caba a bay biba bek Hulanda, pa e bin como testigo den e caso aki pa confirma cu el a bisa cu e caso lo no wordo posponi mas.

De Hoogd a bisa huez cu su cliente a para ariba cu e no tabata tin nada di haber cu e caso aki.
E abogado a bisa tambe cu den e caso aki tabata tin un tardanza innecesario. El a duna huez un ehempel di un caso di antes den cual tambe documentonan a wordo perdi y O.M a tarda cu e caso.

Segun de Hoogd, den e caso ey O.M a wordo declara no admisible y el a pidi pa e huez dicta mescos den e caso aki. Fiscal a indica cu pa O.M wordo declara no admisible, mester tin prueba cu ta pa malo cierto iregularidadnan a tuma lugar di parti di husticia of O.M.

Segun fiscal den e caso aki esey no ta e caso. El a bisa cu algun cos no a bay full bon pa loke ta e documentonan den e caso, pero esey no nifica cu O.M mester wordo declara no admisible.

Fiscal a bisa tambe cu no ta asina asina bo por bay yama un huez como testigo den e caso, pa e bisa loke e lo a trece dilanti anteriormente. Por djis wak e documentonan di e caso y check exactamente loke huez a bisa, pasobra tur cos a wordo anota.

Huez a bisa cu e no por bisa si O.M ta no admisible of no, pasobra e no tin e dossier completo di e caso. El a splica cu ta na e huez cu ta bay trata e caso, pa dicidi si O.M no ta admisible, a base di loke de Hoogd a trece dilanti. Huez a pospone tratamento di e caso te cu dia 15 di September.

- Advertisement -

DUNA COMENTARIO

Please enter your comment!
Please enter your name here