Home Editorial Editorial: ENTRE POLITICA Y REALIDAD!

Editorial: ENTRE POLITICA Y REALIDAD!

1
0
SHARE
- Advertisement -

jossy_mansur_pic              Politica mester ser eherci pa hendenan cu tin e capacidad y e inclinacion pa hacie, no pa ken cu ta, ni pa algun iluso cu por a hinca den nan cabez cu nan a obtene sabiduria durante un anochi di insomnio.  Realidad ta loke ta existi, loke ta medible, loke ta pragmatico. Confundi un cu e otro ta propio di hendenan insensato, cu na lugar di busca enfoca cosnan cu ta interesa nos como Pueblo y como isla, ta perde nan tempo cu algun tipo o sorto di estrategia cu no ta funciona ni den un dictadura, corda den un democracia.

               Fin di siman tabata tin hopi agitacion entorno e descubrimento cu e caha di morto di e gran lider Arubiano, Betico, a ser saca di su graf, Dios y e autornan so sa cu ki intencion. Bo no por cuminza parti culpa pa loco y purba crucifica cune cualke factor politico activo na Aruba. Mientras no tin un claridad absoluto riba e hecho, mientras no haya e culpablenan, no ta prudente mustra dede riba cualke sector djis pasobra e no ta cay bo bon, o pa motibo cu bo no ta comparti su ideanan, ideologia o forma di procede.  Lo corecto ta warda e investigadornan oficial bin cu nan descubrimento, pa djey lanza acusacionnan cu ta bin al caso. Y den e situacion aki, mi ta haya cu e peso total di Ley mester ser aplica na e responsablenan di un acto asina baho.

              Ami no ta comparti ningun pensamento cu ta bay den e direccion di bruheria pasobra mi no ta kere den dje; mi no ta haya cu hendenan civiliza, cu bon educacion, por sinta perde nan tempo cu cosnan cu no ta real. Un o mas hende (bibo!) a comete e fechoria grave ey, y ta riba nan mester concentra pa logra nan identificacion y djey aplica e castigonan cu nan merece.  Speculacion den e caso aki no por ta un substituto pa realidad, y no mester ser entreteni tampoco pa politiconan interesa mas den acusacion y beneficio politico cu den e descubrimento di e berdad y e condena corespondiente.

              Cu nos tur ta desaproba e hecho cu tur nos forzanan no tin duda. Ta mentenan diabolico so por a formula un plan asina macabro y di asina mal gusto. Mi ta spera cu politica no por a baha te na e nivel ey.  Difuntonan mester ser laga na paz, pa nan disfruta di e descanso cu nan no a haya mientras nan tabata na bida y ocupa cu e problemanan di henter un poblacion y un isla. Esey nan merece como recompensa pa nan sacrificionan y nan dedicacion. Den e caso di Betico esey ta especialmente berdad.

              Algun ya ta relacionando e caso aki cu un venganza pa e pagamento di un vlam na pia di un statua, otronan na e desesperacion pa convoca un grupo suficientemente grandi pa manifesta contra Gobierno y  purba deroke, loke no por a ser logra.  Ami no ta kere den ningun di nan dos. Mi ta un persona cu ta kere den e Leynan cu ta goberna politica riba nos isla. Semper nos a elegi nos gobiernonan via urnanan electoral, no riba caya. Pober di nos (y di Aruba) dia cu nos mester cuminza kita o pone Gobierno for di riba caya y no cu nos votonan. Nos mester sigui kere den paz, den e formanan pacifico di procede, y nos mester aparta di nos mes cualke manifestacion di violencia, pasobra una vez esey cuminza desplaza trankilidad, no ta bay keda nada di balor pa rescata riba nos isla.

             Pesey mi ta bisa, ban keda trankilo, ban laga e autoridadnan haci nan trabao y investiga e caso repudiable aki, y ban confia cu nan lo logra identifica e enfermonan mental cu a comete un acto asina abominable.

 

               

 

- Advertisement -

DUNA COMENTARIO

Please enter your comment!
Please enter your name here