Home Editorial Editorial: Politica cu y sin sentido!

Editorial: Politica cu y sin sentido!

0
0
SHARE
- Advertisement -

jossy_mansur_pic               Tin biaha cosnan ta sosode den politica cu bo ta trata pero no por compronde.  Por ehemplo, mi no por imaginami con un politico cu hopi experiencia por haci e promesa cu ta bay elimina brandstofclausule, sin specifica cu kico ta bay reemplaza loke e ta produci pa caha di Gobierno.  Cosnan na Aruba no ta di gaba, y ya mitad di B.B.O. a ser elimina sin cu su aporte a haya un substitucion. Goberna kier meen mira padilanti, studia e efectonan secundario di cualke decision, y analiza bon den ki sentido e ta faborece Gobierno y Aruba.  Ademas, si mi memoria no ta fayami, e promesa no tabata pa kita mitad di B.B.O, sino pa elimine completamente! Dos promesa cu mi ta mira sumamente dificil pa cumpli cu nan. Si ta pa ganashi politico nan a ser haci, anto nan no tin sentido.

              A priminti di traha pa trece KLM back y el a ser logra; di negocia cu un linea di bapornan crucero pa su barconan bolbe bishita nos isla, y el a ser cumpli; di habri e refineria, y el a bira un hecho. Esakinan ta promesanan cu tin sentido pasobra nan a ser cumpli

             Hopi placa a ser gasta den viahamento paki paya, sin produci beneficio pa nos isla. A bin cu e plannan di un par di parke cu den ningun sentido ta bay alivia e situacion economico cu nos ta aden, ni maske cuanto baiskel core di playa pa aeropuerto, o pa Malmok o Palm Beach! E trabaonan pa embeyece Caya Grandi a cuminza y ya tin un par di siman caba cu e mesun cobamento y raspamento di asfalt a ser haci y nada otro atuma lugar. Comercio den e centro di ciudad ta sufriendo y ta bay sigui sufri hopi mas prome cu e proyecto ey bin cla.

               Ademas, manera ami ta mire, ya e mundo comercial di Aruba a muda pa Palm Beach y ta situa dilanti di e hotelnan.  Ta mi opinion cu ni maske con drecha Caya Grandi, cu o sin tram, mi no ta kere cu e fluho di hende cu antes tabata bishite ta bay bolbe pa e centro comercial tradicional di Aruba.

              Mi por ta ekiboca, pero asina e ta parce ora mi pasa anochi den e scuridad y abandono di un caya antes glorioso di nos isla, y mi compare cu e bida cu ta herbe den e area frente e hotelnan.  Con bo ta bay trece e clientenan back for di un par di centro comercial bon organiza y hopi atractivo? Mi no por imaginami cua lo ta e incentivo pa induci nan regresa Oranjestad pa haci nan compranan o paseonan den Caya Grandi, ni maske con bunita e bira.  Ademas, tin masha poco vitrina via cual por contempla e productonan na benta, y en cambio bo ta haya un rij yen di structuranan di metal di ariba te abao pa protege e lugar di e antisocialnan, pero cu alavez ta sconde for di bista e productonan cu tin na benta.

              Tin decisionnan politico cu tin sentido y otronan cu no tine. Mi ta spera cu di awor padilanti e prome impone su mes y e di dos desaparece por completo.  Esey, claro, ta depende di e politiconan cu tin den Gobierno y cu ta e doñonan di e decisionnan cu mester ser tuma. Pero, pa loke ta trata decisionnan, mi no ta mirando hopi di nan,  y nan ausencia ta causando un malestar grandi den Pueblo, cu a cuminza duda den e capacidad di esnan cu mester tuma nan.

- Advertisement -

DUNA COMENTARIO

Please enter your comment!
Please enter your name here