Home General Tin tres interesado pa explora gas y ningun ta Valero

Tin tres interesado pa explora gas y ningun ta Valero

0
0
SHARE
- Advertisement -

ORANJESTAD(AAN):–Minister encarga cu Asunto di Finanza y Utilidad ing Mike de Meza ta reacciona riba speculacionnan den prensa encuanto exploracion di gas na Aruba, informando cu tin tres empresa cu a mustra interes. Sinembargo Valero no ta den e tres gruponan aki.
Minister de Meza ta splica cu Gobierno tin mas cu un aña caba trahando riba e proyecto di gas, despues di a wordo aserca pa tres compania di renombre internacional cu ta interesa pa wak si nan por haya un concesion pa studia y evalua e posibilidad di existencia di gas natural den awa teritorial di Aruba.


Gobierno den e materia aki a aserca Gobierno di Hulanda pa brinda su apoyo por medio di expertonan riba materia di energia. Hunto cu Aruba ta haciendo un estudio riba cual ta e forma pa haci e procedura den e forma mas efectivo y segun ley.

Tambe Aruba ta hayando ayudo tecnico for di Energiebeheer Nederland, di Estado, cu ta e experto den estudio y exploracion. Den e reciente bishita pa Hulanda, e mandatario a topa cu e organisacion Toezicht Staatsmijn di Hulanda, un entidad hopi importante den e rikesa di mineral y tur e proceduranan cu mester wordo hiba.

E companianan internacional ya caba a duna nan presentacion na Gobierno y a base di esaki un comision di Departamento Economico di Aruba a traha un rapport riba e posibilidadnan y di estudio seismografico.

Gobierno a base di tur e informacionnan cu nan a bin ta acumulando, a pidi Parlamento pa organisa un “hoorzitting” cu e comisionnan di Parlamentonan cu tin di haber cu e tema, Departamento Economico di Hulanda, partnernan potencial, manera Gas Unie. Minister de Meza ta kere cu como partner den Reino Hulandes, mester por haya e ayudo for di Hulanda.

E mandatario kier pone bon cla cu no tin ningun MOU (Memorandum of Understanding) firma, nunca a papia cu Valero riba esaki y tampoco nan a mustra interes pa un proyecto asina. “E ta algo fundamenta politicamente pa haci un issue, pero loke nan ta bisa no ta berdad,” de Meza a indica.

E companianan ta conoci rond mundo y ta monitorea tur desaroyo y nan sa unda tin potencialnan. E hecho cu hopi cerca di Aruba, den awa di Venezuela, a haya un di e reservanan mas grandi den Caribe, a crea mas interes cerca nan pa evalua e areanan cu ta cay cerca di Aruba. “E ta asina cerca cu nan ta pensa cu Aruba tambe por tin,” Minister de Meza ta bisa.

Di otro banda tin dato y estudionan haci den final di añanan ochenta, buscando azeta, caminda a haya hopi informacion y evaluando esaki haciendo uzo di tecnologia mas moderno, a crea mas interes cerca e companianan. Diferente muestra tuma den pasado ta duna indicacion cu e cama marino tin un “profile” cu ta indicativo cu por tin gas.

- Advertisement -

DUNA COMENTARIO

Please enter your comment!
Please enter your name here