Festival Internacional Di Piano Fin Di September

Publication: Friday, 10 June 2011. Categoria: Evenemento

ORANJESTAD(AAN) E aña aki e 5th International Aruba Piano Festival lo ta entre 24 di September cu 1 di October. Stichting Crescendo, e organisacion tras di e evento, a publica e lista impresionante di artistanan cu lo participa den e festival: e pianistanan Alan Weiss (USA), Harold Martina (Corsow), Lucille Chung (Canada), Jura Margulis (Rusia), Tian Lu (China) y Wim Statius Muller (Corsow). Pa violin a ser confirma Alissa Margulis (Rusia), Yura Lee (Korea) y Mirjam Tschopp (Switzerland). 

Otro artistanan ta Tim Park (cello), Nicaulis Alliey (flauta). Aruba ta contribui cu e gran musiconan Tica Giel (canto), Nicole van Eer (canto), Marlon Titre (guitara) y Armand Simon (piano).

Na 2011 ta exactamente 200 aña pasa cu e gran pianista y virtuoso Franz Liszt a nace. Liszt ta wordo considera como e pianista mas virtuoso den historia di musica. Hopi biaha despues di su conciertonan, e piano a keda na werki y e organisadornan mester a pasa hopi trabou pa drecha tur e cuerdanan cu a keda kibra.

E festival ta habri cu un recital dedica na Liszt.

E anochi aki diferente pianista lo toca su obranan, cual ta wordo considera como e obranan mas virtuoso y dificil cu ta existi pa piano.

Un parti hopi importante di e festival ta e “Crescendo Piano Competition”  pa hoben entre 8 cu 18 aña di edad.

Emile Ponson a bira ganador absoluto di e ultimo competencia na 2010.

E aña aki e lo defende su corona, pero e competencia lo ta fuerte.

E ganador lo ricibi un beca di Aruba Scholarship Foundation, cual ta cubri e gastonan di full un aña di piano les. Ademas, Classical Music Board Bonaire ta invita e ganador pa presenta na Boneiro, cu ticket y estadia paga.

Pa participa mester entrega e formulario di inscripcion prome cu 9 di September na Da Vinci Academy. Ariba e website www. Aruba pianofestival. com  por haya mas informacion tocante a reglanan di e competencia. E competencia ta bai tuma lugar riba diadomingo 25 di September.

Durante e siman tin diferente recital, master classes pa piano, guitara y violin. Pa mas informacion tocante e festival por bishita e website menciona .  

Leave a Reply