Booshi Wever a distancia su mes di e bataya pa liderazgo di MEP

Publication: Thursday, 30 June 2011. Categoria: General,Politica

Awe mainta e tin conferencia di prensa pa duna e motibonan
Evelyn Wever a postula su mes na ultimo momento
ORANJESTAD (AAN): Te cu diaranzon merdia tur cos tabata mustra cu ta tres candidato so tabata tin den e bataya pa conkista e puesto di lider di partido MEP. Den e bataya aki tabatin Ady Thijsen, Carl Giel y Booshi Wever. Sinembargo pa exactamente 3or di atardi, net ora di e deadline, a bin un candidato mas den persona di Evelyn Wever Croes. Den un comunicado di prensa emiti ayeranochi despues di Conseho di Partido, a anuncia cu nan a haya 4 candidato cu e postula su mes pero cu durante pleno reunion di Conseho di Partido un miembro, Drs. Booshi Wever, a hala su postulacion aden. Cu esaki e candidato mas fuerte y cu mas aña di experiencia den e lista di candidatonan pa liderazgo di MEP a dicidi di hala atras.

Esaki tabata di spera, pasobra Booshi Wever a anuncia publicamente desde un principio caba cu e unico forma cu e lo postula su mes ta si Nel Oduber sostene su postulacion. Tabata bisto cu e bataya final lo a bira entre e dos Wevernan den e partido, esta Evelyn y Booshi. Ta esaki precisamente Booshi Wever kier evita, pasobra e lo a haya mas corecto si por a sali for di e postulacion aki den forma interno pa no bin un pelea pa e funcion aki.

Sinembargo, e cosnan a cambia na caminda. E mesun Nel Oduber cu a duna Booshi Wever su “palabra di homber” cu e lo sostene pa lider, despues a bay publicamente na radio y television y ataca su colega di partido. Un ke otro a cay den masha mal tera y Booshi Wever no a pena pa contesta Nel Oduber tampoco.

Hopi a pensa cu e tension den partido lo a baha pero ta parce cu e “kliek” di cierto famia y cierto gruponan ta sigui grandi y ta domina e interesnan den MEP. Esaki mes ta evita cu por tin union y hermandad den e partido cu Betico Croes a funda na aña 1973 cu idealnan totalmente diferente. E tempo ey e partido tabata claramente pa lucha pa idealnan di e pueblo, manera ta su Status Aparte.

Kico lo sosode awor no ta mucho bon conoci ainda, pero Booshi Wever a anuncia mesora cu awe mainta e lo tene un rueda di prensa den cual e lo comunica na su votadonan riba kico lo ta su futuro den politica y di con el a postula su mes pa lider di MEP y pa despues hala su postulacion aden.

Ta obvio cu e no a keda contento cu e “wega” cu a hunga internamente y specificamente cune. Booshi Wever a demostra den su añanan cu el a milita den politica y exclusivamente den MEP cu e ta un homber di palabra y cu e no ta hala tras riba su pensamentonan, sea con drastico nan por ta. Pa loke ta eleccion pa lider di MEP, Conseho di partido a dicidi cu e fecha tentativo pa Congreso ta bira diadomingo 2 di October 2011.

Leave a Reply