Home Editorial Criminalidad ta sigui crece

Criminalidad ta sigui crece

3
0
SHARE
- Advertisement -

            No tin ningun hende mas na Aruba cu ta inconsciente di loke ta pasando, especialmente den e ramo di criminalidad. Corantnan, Radio emisoranan y canalnan di television ta yen di e tipo di noticia aki cu ta cay tur hende pisa, o sea un atraco, un asalto na cas, un bandidahe riba caya, enfin, di un of otro forma cu ta kibra e paz tradicional cu nos a disfruta mayor parti di nos bidanan.
Ya no ta hende bruin, o blanco, o scur cu ta papia spaño o Hulandes o cualke otro idioma so, awor nan ta parce di tin nan propio Nacionnan Uni pasobra nan ta papia cu otro den tur idioma, incluyendo Papiamento. No ta pasa un dia cu no tin algo cu ta altera e nervionan di hendenan custumbra di biba cu trankilidad y ta desea di conserva e tiki paz cu ainda a keda.              Nos tur sa cu Ministro di Husticia ta haciendo loke e por y loke Ley ta permitie, y poco hende por duda den e profesionalismo di nos Cuerpo policial, pero asina mes, cu tur nan dedicacion, e ronda di asaltonan ta sigui sin duna descanso.

             Ta kico por a bay fout? Den e imigracion masal cu nos a haya durante e ultimo decadanan, tabata falta un control severo o por lo menos un intercambio di informacion concreto cu e autoridadnan di e otro paisnan for di unda nan a bin cu por a evita e venida di algun di e malandronan? Criminalnan por a infiltra den tur e hendenan drechi cu a bin pa contribui cu nan trabao na e progreso di Aruba? Nos mesun hendenan ta cay facil pa influencianan di afo? Tin algun problema serio entre Ministerio Publico y e cuerponan di seguridad di Aruba, den e sentido cu nan ta pone malhechornan demasiado lihe den libertad? O tin Hueznan cu no kier aplica medidanan mas severo pa contene e ola di criminalidad cu ta azotando Aruba? E por ta un combinacion di nan tur, pa por a crea un zozobra asina grandi.

            Banda di dje (o hunto cune) nos ta lesando tambe di casonan tristo na cas, unda yiunan ta lanta contra nan mayornan cu violencia, cu ta dal o hinca ruman o tata, y hasta ta lanta man pa nan mama, loke den nos cultura ta un tabu grandi. Bo no por ni lanta bo stem contra bo mama, corda bo man! Pero tur esaki nos a mira ta bin desaroyando banda di un violencia riba caya casi incontrolable. Sicologonan y defensornan di derechonan humano tur ta bin cu nan teorianan di prevencion o coreccion, pero ta simple ideanan cu no tin ningun posibilidad di generalizacion den un mundo y/o comunidad cada biaha mas peligroso y mas violento.

              Con nos ta bay haci anto cu e auge di violencia cu ta azotando nos isla? Cruza braza y spera cu ingenuidad cu e lo bay di su mes? O duna nos cuerpo policial e instrumentonan y e libertad cu nan tin mester pa pone un freno definitivo na e desorden aki den nos comunidad? Sigui trece Hueznan bin pasa dos aña di vacacion na Aruba o nombra nos mesun Hueznan cu sa y por procede cu man duro conra e delincuentenan? Sigui confia den algun Fiscal cu no kier procede contra gobernantenan o politiconan, o manda tur cas y trece algun bon escogi cu si ta dispuesto di cumpli cu nan tareanan manera debe ser? Haci nos por haci diferente cos pa yuda pone e situacion bao control, pero e ta bay exigi algun medida kizas impopular, aunke necesario. Sigui e situacion aki no por sigui! Nos ta riba un mal caminda cu e problema ey y ta nos tur hunto, cu ideanan y decisionnan firme mester enfrente cu curashi pa reducie o pone un fin na dje.

- Advertisement -

DUNA COMENTARIO

Please enter your comment!
Please enter your name here