Home Evenemento Dia di Independencia Filipino Diasabra awor.

Dia di Independencia Filipino Diasabra awor.

0
0
SHARE
- Advertisement -

ORANJESTAD (AAN): Manera tur e ultimo aña nan, Diasabra awor dia 11 di Juni, e comunidad Filipino akinan na Aruba lo festeha nan di 113 aña di Independencia cual ta worde conmemora semper dia 12 di Juni.

   Pa motibo cu e ta cai ariba diadomingo, nos lo celebre e aña aki ariba Diasabra, 11 di Juni.

   Manera tur aña, nos ta spera di por haja e bishita oficial di un di nos autoridad di nos Embahada na Caracas, pero nos no a haja sa ainda ken lo bin, pasobra ta depende si e Consul General nobo lo yega Caracas awe of mayan. Esaki kiermeen tambe cu Consul General Ampeso a despedi di nos cu su ultimo visita y lo bay awor pa su reto nobo na Canada.

   Nan kier gradici Sr. Ampeso di akinan pa tur loke el a haci pa nos comunidad aki na Aruba. Maraming Salamat Congen.

Loke ta jena nos cu hopi orguyo ta cu Aruba ta e poco paisnan fuera di nos Madre Patria Filipinas cu ta celebra e dia aki cu su parti protocolair manera nos ta haciele semper akinan. E aña aki, nos ta celebra e dia di Independencia di Filipinas pa di 9 biaha oficialmente aki na Aruba. Tur aña Señora Ami Henriquez Mendez, Consul Honoraria na Aruba conhuntamente cu su conseheronan ta escohe un grupo di Filipinos cu ta destaca den e comunidad na Aruba. E aña aki no ta otro y a scohe e grupo di ayudo domestico. Esaki ta e grupo cu a yega Aruba pa promer biaha na 1988.

   Despues a bin e grupo grandi pa construi La Cabana na 1989-1990. Asina por sigui menciona cu te cu awe tin varios Filipina sea como pareha of nan so ta traha na Aruba como ayudo domestico. Pesey a scohe e grupo aki, pasobra nan ta e pionero nan y nos kier pone nan den e luz di publicidad. Nan tabata e promer grupo di Filipino nan cu a bin traha na Aruba den e sector priva.  

Ainda mi por corda con nos ta celebra nos fiesta nan den grupo masha chikito pasobra te cu 1989 Aruba tabata conta cu un grupo di mas of menos 30 Filipino. Di e pioneronan aki tur a establece y traha nan hogar akinan. Varios di nan yiu y sigur nan nieto nan a nace aki na Aruba. Hopi a bay traha ariba nan mes cu nan mesun negoshi of ta trahando den otro sector priva. E comunidad Filipino a sinja e tradición y cultura di Aruba pero tambe a sigui sinja nan yiunan nan tradición y cultura Filipino. Pesey tambe Semper nan ta orgulloso di por demostra e pueblo di Aruba nan tradición y cultura. E yiunan a bira e Arubiano nobo of manera nos ta yama nan, e Arubayno -Filipino. Nan a nace akinan y ta bay school akinan y hasta tin algún di nan cu a tuma posición nan clave den nos sector laboral aki na Aruba. Esaki ta e muestra di e manera fácil cu e comunidad Filipino a entegra aki na Aruba. Fuera cu nan tur a yega akinan papiando nan idioma y Ingles, nan a sinja papiamento den un tempo relativo hopi cortico.

Manera mi ta bisa tur aña cu rond di mundo, Filipinas a exporta especialista, doctor, nurse, architecto y tur clase di profesional nan. Actualmente nos tin varios di nos yiunan cu ta studia afor, sea Hulanda, Merca, Canada of Filipinas pa bolbe back como profesional pa yuda aki na Aruba, cual a bira nan cas!!

Esaki ta hacimi como nan Consul akinan hopi orguyoso di mi paisano nan. Nan amor pa e patria aki cu a tuma nan cu man habri y nan no a defrauda e país nobo aki. Y nan ta contribui awor na e economía di Aruba.

Mi kier invita tur mi paisano nan y Aruba en general pa acompanja nos diasabra awor 11 di Juni pa 9:30 am di mainta na Wilhelmina Park pa asina e parti protocolair por cuminsa EXACTAMENTE 10 am. Despues di e parti oficial aki, lo tin oportunidad di tuma un brindis te cu 12:30 na Fort Zoutman. Na mi paisona nan, por favor bin bisti cu boso Filipiniana y Barong Tagalog, cual ta nos trahe nacional.

Pa cualkier pregunta por comunica cu mi persona na e telefoon nan 586-5766 y 748-4955.

Tambe mi kier a recorda boso nan cu diasabra awor Restaurant Hopi Bon Grill tambe ta celebra anochi cu cumindanan manera lechon y pansit, un buffet di cuminda Filipino super sabroso. Mira nan promoción.

Por ultimo, mi kier recorda boso nan carinjosamente pa tene cuenta cu e horario di oficina cu ta di Dialuna pa Diabierna di 1pm -6pm. Por favor, yama prome pa un cita como cu no ta tur ora mi ta na oficina. Gradici tur mi paisano nan cu semper tey pa yuda ora mester di nan y ta desea tur Filipino na Aruba un feliz dia di Independencia di Filipinas.

- Advertisement -

DUNA COMENTARIO

Please enter your comment!
Please enter your name here