Home General Durante Parlatino A Papia Entre Otro Di E Importancia Grandi Di Preserva...

Durante Parlatino A Papia Entre Otro Di E Importancia Grandi Di Preserva Ozone Laag

1
0
SHARE
- Advertisement -

ORANJESTAD(AAN): Parlamentario di fraccion di AVP Donny Rasmijn durante conferencia di prensa di su partido a papia tocante e reunion di Par-Latino cu e y dos colega di parlamento Clarisca Velazquez y Melvin Tromp a atende na El Salvador riba 17, 18 y 19 di Juni.

El a splica cu Tromp y Velazquez a bay pa e parti di e comision di seguridad pa ciudadano, combatimento y prevencion di narcotrafico y criminalidad organiza.

Rasmijn mes a bay pa e parti di comision di medio ambiente y turismo cu normalmente ta wordo presenta pa Chris Dammers y pa MEP esaki ta Edison Briesen.

Rasmijn a splica cu den e caso aki Dammers no por a bay pasobra e ta vice presidente di Staten, pues e mester a reemplaza presidente di Staten kende a bay Hulanda pa e reunionnan inter-parlamentario.

El a splica cu e reunionnan a bay sumamente bon.

“Nos por wak tambe cu Latino America ta integrando mas y mas cu otro den diferente area”.

“Esey ta e intencion tambe di e parlatino, pues pa nos tin ideanan comun y pa hunto nos por confronta diferente problema cu e paisnan ta confronta”.

Esaki segun Rasmijn, kende a sigui bisa cu pa loke ta e comision di medio ambiente y turismo, mescos cu nos turismo ta relata hopi cu nos medio ambiente, nan tambe ta wak e asina.

El a splica cu di otro banda progreso tin un impacto negativo riba medio ambiente.

“Si nos wak bon, durante e dos dianan di reunion cu a bay basta intensivo y tabata basta largo, a bin dilanti un proyecto pa un ley ‘Marco’ pa e gletsjer”.

“Den Zuid America ta solamente 3 pais tin gletjer, pero full Zuid America ta depende di e awanan di e gletsjer-nan”.

Esaki segun Rasmijn, kende a bisa cu hopi di nan proyectonan di energia y hydro-electrico ta bin di e gletjers.

El a bisa tambe cu for di eynan nan ta saca tambe nan awa potable.

E ta un fuente di awa masha importante pa Zuid America.

Durante e reunionnan pues a aproba un ley Marco.

Segun Rasmijn, e ley Marco ta duna cu tur hende ta bayendo den e direccion ey, pues di stipula exactamente kico kier wordo logra.

Tabata tin otro leynan cu a bin dilanti tambe, por ehempel leynan riba e cambionan di clima, pa loke ta con pa proteha e paisnan aki.

Rasmijn a splica cu door cu ta uza petroleo, esaki tin un efecto riba medio ambiente.

“Nos sa cu produccion di CO2 a lanta hopi discusion, riba si e ta causa daño of no”.

”Sinembargo awor ta hopi cla cu e ta causa daño na e laag di Ozone cu tin cu proteha nos contra rayonan ultravioleta di solo”.

Esaki segun Rasmijn, kende a bisa cu e ozone laag aki ta loke ta preveni e gletjers di smelt.

Si mucho di nan smelt, hopi pais lo keda sin awa potable.

E parlamentario a sigui bisa cu awa dushi ta solamente na 3% di mundo bo ta haya esaki y 77% ta bin di e gletjers cu ta reservanan di awa.

“Aworaki nos tin e problema cu door cu e ozone laag ta kibrando door di efecto di ‘carbon dioxide’, tur e gletjers ta cuminza smelt”, segun Rasmijn.

El a sigui bisa cu esaki ta causa hopi inundacion na Zuid America y ta asina tambe cu e reservanan di awa ta wordo perdi.

Door cu asina hopi awa ta smelt eynan, e vaporizacion di awa cu ta colga den e nubianan ta bira mas hopi, cu consecuencia cu bo ta haya yobidanan mas fuerte.

E paisnan aki di Zuid America cu pa hopi aña a lucha pa nan pueblonan haya un mihor porvenir, awor ta haya nan mes ta combati e problemanan cu e awa aki ta causa, incluyendo pobreza y enfermedad.

E parlamentario a splica cu pa loke ta e cambio di clima pa nos area, e pais cu ta afecta nos mas hopi ta Merca.

Merca ta afecta Zuid America tambe, segun Rasmijn.

El a sigui bisa cu nan tur ta conciente di esey.

Pa loke ta reduccion di CO2 na Merca, nan ta bayendo den e direccion ey, pero nan ta un pais hopi grandi, cu consumo hopi grandi di productonan petrolero.

“Nan ta bayendo si den direccion di gas, pero e ta tarda un poco”.

Esaki segun Rasmijn kende a sigui bisa cu si esunnan cu ta wordo afecta door di dje cuminza cuida nan lugar, nan lo tin mas forza pa bay dilanti y reclama.

- Advertisement -

DUNA COMENTARIO

Please enter your comment!
Please enter your name here