Home General Famia Marcolli kier sigui inverti na Aruba

Famia Marcolli kier sigui inverti na Aruba

25
0
SHARE
- Advertisement -

Empresario Julio Marcolli:
A inverti mas cu 60 miyon dollar den proyecto na Palm Beach!
ORANJESTAD (AAN): E empresario argentino-venezolano, Julio Marcolli den entrevista cu DIARIO a papia riba e desaroyo di e proyecto Acqua Condominium y e inversion importante cu esaki ta nifica. Segun Marcolli, e proyecto aki a yega di wordo cuestiona y nan a haya diferente critica señalando cu e proyecto tabata un fraude. Acqua Condominium siman pasa a yega na e fase di Spantenbier di un di su tres toren. Awor nan ta cla pa sigui avanza y yega na e final di e fase aki na April 2012.
Na prome lugar e abogado Marcolli a laga sa cu tur loke a ser haci ta cu recursonan propio. Ta un inversion di famia Marcolli. “Nos no a usa placa di nos clientenan”.

E placa di e clientenan a bay den un “fideicomiso”. Te cu awor tin un inversion di mas di 60 miyon dollar y cu a pasa atravez di un auditoria internacional, Marcolli a splica.

E sistema di construccion di Acqua Condominium ta hopi distinto na esun tradicional. Na Aruba no tabata tin hende prepara pa traha cu e sistema aki. E compania paulatinamente a siña e trahadornan local pa asina no mester a trece hende di afo. Un 95 porciento di e trahadornan ta residente y conforme ley, a bisa.

E proyecto a confronta algun retraso pa motibo di falta di material y tin biaha pa falta di placa. Riba esaki a señala cu na Venezuela ta sumamente dificil pa cumpra dollar. “Ta un delito. Cumpra divisa ta un delito”, a bisa.

Mester recuri na mecanismonan cu e estado ta permiti manera subasta di bononan, di papelnan di e estado, di Petroleos de Venezuela, cu ta worde transforma den divisanan y ta di e forma aki cu e placa por ser treci Aruba, a recalca.

Nan ta confronta cu algun interupcion den e fluho di placa como producto di e situacion y e circumstancianan politico di Venezuela. E proyecto a yega di cana poco poco, pero te cu awe no tin ningun debe cu ningun hende, ni cu ningun proveedor, Julio Marcolli a laga sa.

A agrega cu nan lo sigui mira algun otro tereno, pensa riba mas proyecto. ‘Nos ta hopi satisfecho y conforme cu e manera cu e autoridadnan di Aruba ta trata nos. Nan ta hende sumamente receptivo, habri y nos tin e confianza pa sigui haci inversionnan na Aruba.

Famia Marcolli pa casi 8 aña consecutivo ta viahando pa Aruba tur siman. “Practicamente nos ta arubiano”, a bisa. Nos ta un famia cu a emigra di Argentina pa Venezuela 36 aña pasa. “Tur nos yiunan ta profesionalnan cu ta traha den e tereno di ingenieria y arkitectura y nan si a nace na Venezuela, a splica.

Segun Marcolli, apesar di tur e problemanan politico y economico cu tin na su Venezuela, nan ta construyendo 4 mil apartamento na Isla Margarita, Puerto La Cruz, Caracas y Merida. Tin 4 mil trahador laborando den e proyectonan aki.

Banda di esaki Famia Marcolli tin otro actividadnan economico pero esun principal ta e industria di construccion.

Pakico inverti na Aruba? E tereno caminda Acqua Condominium ta actualmente ta un tereno propio, a enfatiza. “No ta un tereno cu e gobierno di Aruba a duna nos. Ta un tereno propio y pesey a dicidi cumpre ya cu e tabata tin un densidad importante y pre mirando e situacion na Venezuela, a dicidi inverti, a señala.

Apesar di e caida di e mercado di real estate rond mundo, na Aruba e prijsnan a mantene stabil. “Nan a cay un tiki, pero Aruba ta sigui un lugar encantador. No tin dos Aruba na mundo”.
E proximidad cu Venezuela y e recepcion cu nan a haya di parti di e arubianonan tabata factornan primordial pa cual a scoge Aruba pa haci inversion, Julio Marcolli a manifesta.

- Advertisement -

DUNA COMENTARIO

Please enter your comment!
Please enter your name here