Home Editorial Un manifestacion destina pa fracasa!

Un manifestacion destina pa fracasa!

0
0
SHARE
- Advertisement -

         No tabata tin ningun manera cu e manifestacion cu MEP a convoca cu tanto fanfaria por a logra un exito pa e partido, pasobra e tabata basa riba un negativismo profundo y no e deseo of intencion di aporta algo valedero pa Aruba.
Bo no por pretende di haya seguidornan pa un manifestacion di odio, organiza y conduci cu un lenguahe ofensivo y riba un nivel poco biaha scucha na Aruba. Ora cu e ‘lider’ di un partido baha su mes te na un nivel asina iritante bo sa caba cual ta bay ta e resultado di dje. Otro producto a surgi si e tabata pa presenta remedinan pa tur e malnan cu MEP mes a crea durante ocho aña di desperdicio, persecucion politico y abuso. Coregi un mal ta rekeri honestidad y tolerancia, no atakenan verbal lanza a diestra y siniestra contra hendenan cu no tin nada di haber cu e problemanan cu MEP mes a crea.
             Unda tur e hendenan drechi di MEP a keda? Nos tur ta consciente cu e partido tin hopi hende cu ta pensa normalmente y no ta laga nan mes ser venena pa e shishi sin ofishi cu no sa haci nada otro cu crea mas y mas distancia entre e diferente sectornan pensante di Aruba. Cuanto tempo mas MEP ta kere cu e por sigui tras di un lider fracasa sin cu e ta caba pa pone e partido na rudiya y hacie desaparece poco poco di e panorama politico local?

            Esaki no ta e partido cu Betico a visualiza y lidera cu tanto acierto durante tanto aña; e ta un sombra tristo di dje. Na lugar di sinta cabez y cuestiona e proyectonan di Gobierno cu cual e no ta di acuerdo, ata e lider bela a bay den un tantrum di ofensa contra tur hende cu e no ta gusta, incluyendo nan mamanan, casanan, tatanan, abuelonan, y otro hendenan difunto for di hopi aña cu no tin absolutamente nada di haber cu e situacion financiero y economico desastroso cu MEP a crea durante su ultimo estadianan den Gobierno. E idea cu bo por logra progreso a base di tanto odio y rencor por biba solamente den un par di coco bashi, cu ta sona manera maraca cu e poco semiyanan seco cu nan por a conserva.

            Loke si e manifestacion fracasa a logra ta convence hopi hende cu ainda tabata carga e speranza cu lo bin un cambio den e rumbo ekiboca cu e partido a tuma, cu esey no ta posible mas, sigur si e sigui tras di un lider cu a perde cabez y no sa distingui mas entre bon y malo. E confusion cu ta reina den su pensamentonan ta algo cu MEP no por sigui tolera, si e ta di recupera e puesto importante cu e tabata tin como un di e dos partidonan grandi di Aruba. Hasta esey el a destroza den e rabia cu a apodera di dje y ta forze expresa ideanan y sentimentonan enfermizo.
Mi a yega di bise hopi biaha y mi ta bolbe ripitie: bo no por baha un gobierno for di riba caya; ta na e urnanan electoral bo ta haci esey. Y awor cu Pueblo a realiza di berdad cu ta e tin e poder y no e partidonan politico of e politiconan, e tarea di convence di lo contrario a bira un imposibilidad. Ta Pueblo ta escohe su gobierno cu su voto y ta cu su voto e ta cambie ora e no funciona manera debe ser.

           E desperdicio di tanto energia, tanto convocacion, tanto cansamento di pulmonnan lanzando gritonan bashi na radio y television, ta lamentable, pasobra e mesun energia ey por a ser inverti den propone solucionnan importante pa e tantisimo problemanan cu a ser crea y cu ta toca e actual Gobierno enfrenta y purba soluciona. Su exito lo ta e exito di Pueblo y di Aruba, no di su partido so. Mare e voznan sabio di MEP (y nan tey!) cuminza reacciona publicamente contra e veneno cu e lider fracasa kier spart tur rond, comosifuera e por cura algun mal cune. Ta cu cerebronan balancea, y sentimentonan puro pa bo isla, bo por logra loke e manifestacion a pretende di obtene a base di odio, ofensa y mentira.

- Advertisement -

DUNA COMENTARIO

Please enter your comment!
Please enter your name here