“ Booshi Wever a coba un buraco pa mi persona y pa Mervin Ras y awor e mes a cay aden”

Publication: Saturday, 30 July 2011. Categoria: General

Segun Parlamentario Independiente Marisol Lopez _ Tromp:
ORANJESTAD (AAN) — DIARIO a entrevista e Parlamentario Independiente, drs. Marisol Lopez- Tromp, relaciona cu e salida di sr. Booshi Wever for di e partido geel y con e ta mira e desaroyo aki. El a cuminza pa corda con su persona hunto cu Parlamentario drs. Mervin Ras a wordo saca for di e fraccion di MEP, consecuentemente for di e partido, pasobra nan a vota na fabor di cambia edad di pension di minister y parlamentarionan pa 60 aña. E momento ey di ocho asiento fraccion di MEP a baha pa seis, y awor a keda cu cinco. Parlamentario Marisol- Lopez Tromp a haci e observacion cu Booshi Wever a traha un buraco pa su persona y pa Marvin Ras, den cual awor e mes a cay aden, y apenas seis luna despues su coleganan a lague cay, y awor e ta declarando su mes independiente, aunke esaki ta un palabra cu e no kier hinca den su boca, y ta papia di parlamentario suigeneris, of parlamentario ciudadano.
” Di con? Pasobra el a yama mi persona y Mervin pa ladron di asiento, durante simannan largo, pa traicionero y tur sorto di palabranan menos bunita, y awor ta haye cu scupi cu el a tira na halto ta bin cay na su cara”, Marisol Lopez- Tromp a subraya. El a recorda tambe cu sr. Wever a yega di bisa cu e asientonan ey den Parlamento no ta di nan pero di MEP, y segun sra. Lopez- Tromp si e tabata un homber di palabra e lo sede e asiento ey na otro candidato y no bay ocupa e asiento como parlamentario independiente.

Marisol a declara cu e mesun palo cu sr. Wever a uza pa dal e pinata pa haci fiesta y saca e hunto cu Mervin for di Parlamento, nan a dale cune y su propio coleganan a mande un carta cu 20 punto, cu e tin entendi a wordo compila pa sra. Evelyn Wever- Croes, y den e binti puntonan aki nan ta pone bon cla pakico nan ta considera cu sr. Wever no ta apto pa bira lider di MEP na e momentonan aki.

E parlamentario a acentua cu e tin hopi gana pa sr. Wever publica e carta cu e binti puntonan aki pa no solamente e votadornan di MEP, sino pueblo di Aruba en general conoce e motibonan pa cual su coleganan di partido ta considera cu e no ta apto aworaki pa bira lider di MEP.

” Si bo ta transparente bo ta publica nan, y bo ta splica pakico nan no ta cuadrando cu berdad. Tempo cu mi a ricibi carta for di e lider di partido sr. Nelson Oduber, caminda cu e ta pone cu Partijraad ta saca Mervin y ami, pasobra nan ta considera cu nos a actua contra e miembronan di e partido, cual na mi opinion no ta berdad, pasobra meta di e partido ta hustamente pa para banda di e homber chikito, pa loke ta pension y salario, mi a publica e carta ey pa pueblo por a mira y por a lesa, kico ta e puntonan cu MEP a pone den mi direccion. Mi a refuta nan, mi no tabata di acuerdo cune, y e tempo ey Mervin y ami a bira independiente, pasobra nos a kere cu nos tin un trabao pa haci den Parlamento, nos cada un a haya voto, hopi hende a pone nan confianza den nos pa nos ta un Parlamentario y nos no a defrauda nos votadornan”, Lopez- Tromp a subraya. Parlamentario Lopez- Tromp ta convenci cu publica e carta ta locual sr. Booshi Wever tambe mester haci.

Leave a Reply