Home General Prome Encuentro Bienal di Arte Contemporaneo di Caribe, Aruba 2011-2012

Prome Encuentro Bienal di Arte Contemporaneo di Caribe, Aruba 2011-2012

8
0
SHARE
- Advertisement -

ORANJESTAD   (AAN):    Awendia arte contemporaneo di Caribe, ta genera un interes inmenso den nos mes region y den otro partinan di mundo. Arte actual, arte contemporáneo y artistanan di actualidad ta participa den exposicionnan colectivo cu ta tuma luga na Europa y na Estados Unidos. Y nacionnan den Caribe riba nan mes ta centronan di atencion pa tene bienal, trienal y diferente actividadnan riba tereno di curaduria y tambe riba tereno di teorianan tocante di arte.

     E actividadnan aki cu ta tuma luga den paisnan den Caribe -manera Aruba mes- tin como beneficio cu obranan di arte di nos propio artistanan, ta circula y ta worde exponi y comenta, regionalmente y globalmente.

     Fundacion Prome Encuentro Bienal Arte Contemporaneo di Caribe, ARUBA, ta desea di contribui na ingresa Aruba y profundisa su participacion den e dinamica artístico regional aki y netamente pa e motibo ey e fundacion ta organiza un encuentro dedica na arte contemporáneo di Caribe cu ta trece artistanan, criticonan y curadornan di arte hunto aki riba suela di Arubano.

     E encuentro lo funciona como un plataforma dinamico y continuo cu lo ta scena pa un variedad di accionnan artístico.

     E prome pasonan concreto pa realización di e evento a tuma luga caba. Na februari di e aña aki a tuma luga e exposicion Rosea Nobo cu a trece 32 artista local hunto den un exposicion comparti na tres galeria.

     E catalogo di e exposicion Rosea Nobo ta sali na november proximo y tambe tin cuatro documental cu lo pasa na television proximamente.

    Segun plan e programa di e Prome Encuentro Bienal di Arte Contemporaneo di Caribe, lo cuminsa na november 2011 y lo dura te juli di 2012. Algun di e actividadnan cu tin planea ta:

  1. Un workshop educativo dirigi riba gruponan specifico;
  2. Un workshop dirigi riba artistanan;
  3. Un exposición di homenahe;
  4. Exposicionnan individual y colectivo;
  5. Un simposio teorico.

     Curaduria di e evento tin relacion estableci caba cu e artistanan cu lo keda invita na e Prome Encuentro aki. Pa lunanan caba e curador general José Manuel Noceda Fernandez, ta den contacto cu e artistanan, y nan ya a expresa nan interes pa e proyecto Arubano y tambe e boluntad pa participa cu nan obranan.

     Tambe Sr. Nocedo Fernandez a acerca varios conocedornan prestigioso di arte contemporaneo di Caribe, esta, académico-, critico- y curadornan di arte, cual nan tambe a expresa nan reconocimiento pa e proyecto Arubano cu ta tumando forma y nan disponibilidad pa bini Aruba pa comparti nan conocemento y saber cu e publico cu lo asisti na e evento su diferente actividadnan.

      E Prome Encuentro lo tin diferente espacio priva y institucionnan cultural di Ministerio di Cultura como escenario, reparti den diferente districto y bario di Aruba. Obhetivo  primordial lo ta pa familiarisa tur cu acudi na e actividadnan di e Prome Encuentro, sea habitantenan di Aruba y su diverso bishitantenan, cu arte contemporáneo di Caribe.

    Otro punto importante ta cu tin hopi conocemento, pensamento y teoria tocante arte contemporáneo pafo di Aruba, cu nos ta esforza pa trece paden pa medio di e encuentro. Di tal manera provocando y stimulando un clima di fraternidad, di intercambio di ideanan y experencianan, fomentando asina lasonan di colaboración y cooperación entre artistanan di Aruba y esnan di otro contextonan di Caribe, e zona geo-cultural cu nos país Aruba ta pertenece na dje.

- Advertisement -

DUNA COMENTARIO

Please enter your comment!
Please enter your name here