Hopi hende disgusta pa mira cuanto cacho ta worde mata na Shelter

Publication: Tuesday, 16 August 2011. Categoria: General,Policial

ORANJESTAD (AAN); Desde Dialuna atardi cu un hoben local a saca foto di un pick-up completamente yen di cachonan morto den e baki, esaki a hasta bira ‘viral’ localmente!
Hendenan disgusta cu e bista ey, a core expresa nan disgusto! Pasobra riba e foto por mira claramente cu hasta cacho chikito, esta puppies, ta worde poni “na soño” na Animal Shelter di Wayaca. E hoben cu a pone e foto, a splica cu den pasado e mes a yega di hiba hopi puppies pa e Shelter, keriendo cu nan lo haya un second chance den bida, y cu por worde adopta.
Pero riba Dialuna el a bin topa cu e realidad, esta cu hopi di nan no ta worde ‘ofreci’ un segundo bida, y ta djis worde elimina di e mundo aki.
E foto tabata un shock pa hopi hende, pasobra simplemente e palabra ‘shelter’ tabata duna nan e confianza cu e animalnan aki lo bay haya un refugio.

Pero manera a yega di worde splica den pasado, ta hopi cacho y pushi ‘indesea’ ta worde ricibi aki. Nan ta worde examina, y esnan cu ta yen di malesa, of cu ta dificil pa haya tratamento adecuado pa nan, lo worde ‘inyecta’ y poni na soño. Esaki segun standardnan aceptable den mundo di veterinario.

Sinembargo e foto aki, cu a inclui hasta cacho chikito, a laga un sabor amargo den boca di hopi hende local, cu a sigui e imagennan aki riba Facebook. Algun hasta a cuminza yama esnan di shelter como ‘monster’!

Y e reaccionnan awor ta mustra, cu hendenan lo prefera di hiba nan animalnan pa Animal Rights Aruba, pasobra ey sigur nan lo por haya un segundo chens!

Leave a Reply