Home Hudicial Manager di seleccion di baseball di Aruba ta perde su caso...

Manager di seleccion di baseball di Aruba ta perde su caso contra ABBA

2
0
SHARE
- Advertisement -

ORANJESTAD (AAN): Diamars Huez a duna su veredicto den un caso cu Anthony Rombley a entama contra Amateur Baseball Bond Aruba (ABBA).
Rombley a worde representa pa abogado E.H.J Martis, mientras cu ABBA a worde representa pa mr. Peter Mohamed.
Rombley tabata manager di seleccion di baseball di Aruba y na dado momento el a worde notifica cu e no lo ta manager mas di e equipo.
El a disputa esaki y pesey el a entama e caso.
Representantenan di ABBA presidente e tempo ey Eric Mohamed y Wester di bestuur lo a tin un combersacion cu Rombley na October 2009, durante un torneo na Venezuela.
Ambos miembro di ABBA a bisa cu nan a papia cu Rombley y cy Mohamed a bise cu desde e dia ey e no lo ta mas manager di e seleccion.
Rombley su ponencia ta cu nan a papia si, pero cu na ningun momento nan a bise cu nan lo termina su acuerdo di trabao.
Mohamed y Wester sinembargo como testigo a declara cu Mohamed a bise cu door di e mal prestacion di e seleccion, e lo no ta manager mas y cu nan lo sigui page te cu December 2009.
Durante tratamento di e caso anteriormente, ABBA entre otro a bisa huez cu Rombley tabata mucho lat den su peticion pa declara nulo, su retiro como manager di e seleccion.Huez den un sentencia preliminar manera e ta worde yama, a pidi ABBA pa nan demostra cu Rombley tabata lat den su peticion.

Pa ley, un persona tin 6 luna pa haci tal peticion.Segun Mohamed y Wester, na October 2009 caba nan a papia cu Rombley y el a worde bisa cu e no ta manager mas di e seleccion. Ta te Juni 2010 Rombley a haci un peticion na corte pa declara su retiro nulo.
Esey ta pues mas cu 6 luna, pues huez en su decision a tene cuenta cu esaki tambe.

Huez a bisa cu e no tin motibo di duda cu Mohamed y Wester a bisa Rombley na October na Venezuela cu e no lo ta manager mas di e equipo. Ademas di esaki huez ta haya cu e peticion di Rombley tabata lat, pues el a dicta na fabor di ABBA. E retiro di Rombley como manager di seleccion di baseball a keda para y huez a dicta cu e mester paga e gastonan tambe di e caso aki, cu ta na 3,600 Florin.

- Advertisement -

DUNA COMENTARIO

Please enter your comment!
Please enter your name here