Home General Pa prome vez dos hende muher na timon di SIMAR

Pa prome vez dos hende muher na timon di SIMAR

4
0
SHARE
- Advertisement -

Egberto Werleman di directiva nobo SIMAR:
ORANJESTAD (AAN) — Manera ta conoci, diabierna anochi a tuma lugar e eleccion di un directiva nobo pa Sindicato di Maestro di Aruba, SIMAR, y DIARIO a entrevista señor Egberto Werleman, miembro di e Directiva di e sindicato. El a comenta cu e reunion a dura largo, debi a discusion cu a surgi, ta ken ta scoge e presidente di SIMAR, si e miembronan of e directiva mes.
El a señala cu segun e statuto renova di aña 2010, e unico posibilidad cu tin pa scoge e presidente ta door di e bestuur mes, y lamentablemente ora e statuto a wordo renova e parti aki no a wordo cambia, y unico caminda cu tabata tin ta pa laga e directiva scoge su presidente. Nan lo sigui atene na kico e statuto ta stipula, aunke e custumber tabata cu e miembronan ta scoge e presidente, pero esaki lo wordo bon ancra den un reglamento nobo cu e sindicato ta bay traha riba dje.


Sr. Werleman a bisa cu esaki mester ta asina pa dia di mañan ningun miembro por bisa cu un decision a wordo tuma contra e statuto, cu e ta invalido of ilegal, of mas ainda hiba nan dilanti Corte den un caso asina.

Pas prome vez e sindicato tin dos hende muher pa dirigi e sindicato.
E directiva a keda forma pa Maruschka Corneli, Robin Didder, Roland Tromp, Nel Petronia y Egberto Werleman. E fecha riba cual lo reparti e tareanan door di e directiva nobo, tabata ayera. Algo cu a resalta ta cu señor Ivo Valdez, no a pone su mes relegible como miembro di e directiva di e sindicato, y segun sr. Werleman esaki ta un escogencia cu Valdez mes a haci.

Tambe a sosode cu door di e tardanza y e discusion hopi miembro a move bay, bao argumento cu nan no tin tempo pa perde. Sr. Werleman a señala cu esaki no ta e prome reunion cu ta tuma lugar, unda tin e sorto di discusionnan aki y pesey hopi miembro a expresa cu nan ta cansa y fada y nan a bisa cu nan a bin pa vota, nan kier un directiva, pero tanto discusion asina nan no kier.

Diadomingo lo tabata e prome reunion cu e directiva nobo exclusivamente pa reparti e tareanan, segun sr. Werleman a remarca. Finalmente sr. Werleman a bisa cu SIMAR ta di tur su miembronan y aunke tin cosnan cu tin biaha por tin discusion riba nan, nan ta keda maestro, colega, y cu nan tin cu traha hunto pa yuda otro, pa hiba enseñanza dilanti y tambe e posicion huridico y material di su miembronan dilanti!

- Advertisement -

DUNA COMENTARIO

Please enter your comment!
Please enter your name here