Home General Sistema di Knipper Licht na cruzada di Drive Inn treciendo gran alivio...

Sistema di Knipper Licht na cruzada di Drive Inn treciendo gran alivio den trafico entre pariba y pabao di brug Vigente tanten nan drecha brug bieu!

1
0
SHARE
- Advertisement -

Hefe trafico San Nicolas:
ORANJESTAD (AAN) – DIARIO a entrevista señor Roland Halley, Hefe di Polis di Trafico pa e distrito di San Nicolas, ken ta encarga pa regla e fluho di trafico den e cruzada di Drive Inn, cua a bira mas druk cu normal, debi na ceramento di brug bieu, cu ta den proceso di reconstruccion.
Sr. Halley a duna di conoce cu e tey tur dia mainta di 6’or pa 8’or, debi cu como cu e brug ta cera debi na e trabaonan di renovacion, e trafico ta sumamente druk y e ta pega te pariba di e rotonde di Pos Chikito.
El a splica cu ora e ta pone e luznan di trafico riba “knipper licht” (oranje) y e ta laga e autonan cu ta bay den direccion di Playa core mas rapido cu esnan cu ta bay pa Santa Cruz, y esaki ta debi aworaki un caminda so tin, door cu e brug bieu ta cera y e trafico tin cu pasa via di Fransepas of e caminda grandi, y tin hendenan ta prefera di pasa e caminda grandi. Esaki ta cu e caminda ey aunke e ta un poco drecha e no ta di e bon ey pa core.
El a agrega cu D.O.W tin planea pa tin cera e brug aki pa dos luna, y den e lapso aki cinco dia pa siman lo bin cu reglanan di trafico pa e cruzada di Drive Inn, y su conseho pa chofernan ta lanta un tiki mas tempran.
Sr. Halley mes ta lanta mas tempran pa e ta den e cruzada na ora, y e ta conseha tur hende pa haci asina.
El a subraya cu Cuerpo Policial ta haci esaki pasobra nan sa mira cu hopi chofer ta baha banda robes di e caminda di e brug nobo y core riba e acera bin abao y esey no por.

El a bisa cu si esaki sigui sosode e lo pone polis controla banda di e caminda ey y parti boet. El a agrega cu pariba di e caminda aki, banda di un negoshi di pieza di auto, hopi chofer ta drenta den e caminda di santo pa pasa e caminda di Barcadera pa yega aeropuerto, y esaki ta un alternativa pero e ta stanca e trafico, cu ta core straight bay abao.

E ta aconseha tur hende pa un bez nan mira e luznan banda di Drive Inn bira Oranje, sigui bin straight bin abao. E luznan ta wordo teni na oranje di 6.40 te 8’or di mainta. El a agrega cu banda di 7.45’or ayera, e trafico a bira normal caba, pasobra for di diabierna e ta bezig cu esaki y e hendenan a cuminza custumbra. Sr. Halley a comenta cu hopi hende no ta compronde cu ora un polis tey y e luz na knipper, ta e polis ta manda y ora e ta duna instruccion pa nan sigui core tin hende ta keda para ta duda, comosifuera nan no sa ki pa haci.

No obstante hopi a capta e señalnan cu e ta duna nan, y esaki ta normanan internacional cu el a siña 36 aña pasa na School di Polis y cu te ainda e ta uza nan. Polis di trafico lo keda eynan pa dos luna sigur, te ora e brug wordo renova. E tin tambe un suplica pa e trafico di Santa Cruz, cu ta bin di e birada di Mondi Fierno pa nan pasa via Fransepas, pa yega na e rotonde di Pos Chikito, cu lo alivia e trafico hopi mas, pa motibo cu e trafico masha hopi mes, pa motibo cu e autonan di hendenan cu ta traha na WEB of otro lugar den e area aki ta tiki, y si e resto cu ta bay San Nicolas tuma e caminda menciona lo alivia e trafico masha hopi mes.

Sr. Halley a menciona cu ayera e fluho di trafico a bay hopi bon, e chofernan a compronde e mensahe, nan a core basta normal ni mucho lento ni mucho rapido.

Finalmente el a bisa cu e plan di hopi aña pasa ta traha un rotonde den e cruzada di Drive Inn, pero no uno chikito sino basta grandi, cu e trafico por bay tur direccion y cu lo nifica un alivio masha grandi mes, pasobra e rotondanan ta traha pa dos auto pa abao, dos pariba, dos panoord, dos pazuid, y si den future nan traha e rotonde aki conecte cu Pos Chikito, y alivio so lo tin. E ta kere cu di ultimo lo mester haci esey na aeropuerto, cu tambe lo trece un alivio hopi grandi pa e trafico.

- Advertisement -

DUNA COMENTARIO

Please enter your comment!
Please enter your name here