CEA a gara cuidador di preso drentando KIA cu dos BlackBerry scondi den pan

Publication: Monday, 5 September 2011. Categoria: General

ORANJESTAD(AAN): Diasabra mainta alrededor di 7or e personal atento di CEA para na porta di KIA a sorprende un cuidado di preso cu 2 BlackBerry bon scondi den su sandwich. Separa di e aparato pa comunica, e tabata tin e chargernan tambe. Ta trata aki di e ambtenaar Javier Ras cu tin algun aña caba trahando den Instituto Coreccional Aruba y cu a keda deteni mesora y entrega na Polis pa mas investigacion. E asunto aki ta masha serio y for di basta aña caba tabata tin atencion di esunnan responsabel pa cuida e instituto.
E problema ta cu tur hende sa cu ta e mesun cuidadonan di preso ta trece BlackBerry eyden y bende cu e presonan. Pero e problema ta cu pa garanan ta dificil. Mayoria biaha ta hinca e celular den un saco di plastic y sconde esaki den cuminda di e trahado, tapa bou di aros y sauce.

Pa e personal di CEA ta dificil y hasta contra ley pa exigi di e personal di KIA pa nan mishi den su cuminda buscando articulonan prohibi. Un solucion lo ta pa prohibi e empleadonan pa bin trabao cu cuminda pero esey lo nifica e ora cu ta KIA mes lo mester percura pa cuminda pa su empleadonan. Sin duda e lo pisa riba e presupuesto di e instituto. Un otro solucion, esun mas factibel, ta pa instala un aparato pa blokia señal di celular den e instituto.

Den pasado a yega di hacie pero e aparato tabata blokia un area mucho grandi, consecuentemente e tabata stroba e bisiñanan tambe di ricibi of haci yamada via celular. Ta pensa cu mester tin un aparato den cual ta blokia e señal di celular den un area mas chikito. Asina ta evita e asunto di drenta cu celular den forma ilegal den prizon.

Diasabra mainta mesora a cuminsa dos trayecto na momento di gara Javier Ras cu celular modelo BlackBerry scondi den su pan. E prome ta e trayecto disciplinario, den cual a prohibi su entrada den KIA por lo pronto ya asina por realisa un investigacion interno riba e asunto aki. E otro trayectoria cu ta cana simultaneamente ta esun penal, cu Polis y LandsRecherche lo haci pa asina determina pa ken e a bay hiba e celularnan aki, cuanto nan ta page pa e trabao ey y si e ta forma parti kizas di un organizacion criminal.

Cu e detencion di diasabra mainta mester bay un señal cla pa e personal di KIA y CEA, cu mester bin un reorganizacion y re evaluacion di henter e personal. Minister mr. Drs. Arthur Dowers lo mester cuminsa pensa den “screen” henter e personal, di director te abou, pa sigura cu esunnan cu ta traha eyden ta empleadonan integro, intachable y capas pa cumpli cu nan funcion. De lo contrario lo mester busca un otro ofishi den Gobierno.

Leave a Reply