Home General Complace STA cu un pakete impagable lo costa reduci e cantidad di...

Complace STA cu un pakete impagable lo costa reduci e cantidad di trahadornan di APA!

0
0
SHARE
- Advertisement -

Director Alfonso Boekhoudt:
ORANJESTAD (AAN)– Relaciona cu e negociacion un poco complica entre APA y STA, pa logra un contrato colectivo nobo, di tres aña, pa e trahadornan di Waf, DIARIO a entrevista tambe sr. Alfonso Boekhoudt, director di Aruba Port Authority. Sr. Boekhoudt a duna di conoce cu e reunion tabata hopi fuerte, y manera cu el a indica caba nan ta den un impasse, para na un caminda unda cu ningun di e dos partidonan ta yegando na otro. Director di APA a bisa cu esaki ta debi cu e sindicato ta para riba exigencianan cu ta impagable pa APA, sin nada racional su tras, y unda ningun hende ta compronde e logica cu nan ta purba di uza, y APA no por compronde con nan ta exigi algo cu APA no por paga.


Diabierna ambos partido a bay cerca e Mediador, pa delibera riba un “discussion paper” cu tin riba mesa cu e mediador, y cu for di siman pasa e sindicato a bisa cu esey ta inaceptable pa nan, sin cu nan a consulta cu nan miembronan.

Boekhoudt a agrega cu Diabierna nan a core bin bisa cu nan kier acepta locual nan a rechaza caba sin wak kico e ta nifica pa e empleadonan, y awor cu nan a ripara kico e impacto di esaki ta pa e trahadornan nan a bin bisa cu nan ta acepte, pero e reunion aki no tabata pa delibera riba e “discussion paper” mas, sino riba e exigencianan di e sindicato.

Boekhoudt a bisa cu APA a bin awor cu un proposicion mehor, unda e ta ofrece 3 porciento di aumento di salario pa e empleadonan, pero e ta un average den cual esnan cu gana menos ta bay hopi mas dilanti cu esnan cu ta gana hopi. Esaki pa un termino di tres aña, cual acumulacion ta hiba na 13% di aumento. E director a bisa cu e aumento aki di 3 porciento ta esun di mas halto cu APA a yega di ofrece su trahadornan.

Sr. Alfonso Boekhoudt a bisa cu esaki ta un aumento hopi bon, considerable, cu e trahadornan merece, pero mas cu esey APA no tin espacio pa paga. El a reitera cu esaki ta hopi bon compara cu loke tin den e mercado.

Y ademas di e aumento aki di salario, nan a hisa nan vakantie uitkering, y ta duna nan un bashi premie (voorjaarstoelage), cual no ta punto di discusion aworaki pero e sindicato ta keda exigi cu nan kier mas. El a acentua cu e sindicato su intencion ta pa blokia comercio, waf, y bay welga.

Esey e sindicato a mustra diabierna, segun director di APA, y nan a bin cu e empleadonan pa intimida y mustra cu nan ta dicidi. Boekhoudt a subraya cu e discusion aki ta hopi dificil pasobra e sindicato simplemente no ta compronde kico nan ta discutiendo, y APA kier duna su empleadonan loke nan merece, pero e mester ta na un forma responsable cu e compania por carga, y te na unda APA por bay nan a bay, segun sr. Boekhoudt.

El a agrega cu bon ta, cu nan ta mesa cu Mediador, ken ta purba pa e partidonan yega na otro, y APA ta sinti cu di su banda a purba di duna concesion, pero di banda di e sindicato nan ta keda exigi algo cu nan mes no sa kico su impacto lo ta pa e compania, mientras cu locual e compania ta ofreciendo pa su empleadonan e aumento lo ta di 3, 3 y 3 porciento, pero ora di wak e beneficionan secundario cu tambe ta bay aumenta, e ta mas di 7 porciento di loke nan ta ricibi.

Pa conclui sr. Boekhoudt a bisa cu si mester bay paga un pakete cu no ta pagable, e compania mester tin menos empleado, anto asina ta forza e empresa pa nan disminui su cantidad di trahador, y APA no kier yega na esey pasobra e ta kere cu no ta husto pa bay pone e pan di algun empleado na peligro, pasobra e sindicato ta exigi algo cu ta impagable y cu nan no por hustifica na ningun forma.

- Advertisement -

DUNA COMENTARIO

Please enter your comment!
Please enter your name here