Home Editorial Juan David mester splica nos e motibonan real di su cuestionamento

Juan David mester splica nos e motibonan real di su cuestionamento

0
0
SHARE
- Advertisement -

                 Te ainda mi no a tende di Juan David un splicacion racional pa e postura iracional cu el a tuma contra e proyecto modular cu ta faborece e maestronan y e studiantenan cu localnan adecuado, moderno y bon ventila, pa nan por siña loke e maestronan ta imparti den un ambiente moderno di comodidad. E sa masha bon cu e Ministro no a viola ningun Ley; cu e proyecto no ta di Gobierno; cu no ta Gobierno a bin cune, sino e desaroyadornan di e proyecto. E ta e propiedad di esun cu a propone Gobierno e idea cu el a formula y investiga te den su ultimo detayenan. Gobierno awor no por bin haci doño di dje y mande pa ofertanan publico simplemente pasobra e no ta di dje, y no ta e ta financie tampoco.


                  E ecuacion ta simple: un comerciante, a base di su experiencia cu enseñanza na Savaneta, a haci un proposicion na Gobierno pa yena e necesidadnan di enseñanza na un manera moderno, bon studia, y mas cu adecuado pa e necesidadnan cu tin awor. E proyecto ta spar placa y tempo, y por ser ehecuta den algun luna na lugar di aña. E Ministro no a viola ningun Ley, e no a pasa riba ningun Ley y no a pone ningun Ley un banda ora cu el a dicidi cu e proyecto ta bon y ta reuni e cualidadnan cu e ta desea pa su departamento. Pesey mi ta bisa cu mester tin otro razon pakico Juan David ta asina reacio contra e proyecto.
                 E ta rabia pasobra e Ministro no a consulta cune? E no ta compronde bon con e proyecto ta hinca den otro? E no a saca su som tocante cuanto placa Gobierno ta spar cu e proyecto? E tin amistad cera cu e doñonan di e trailernan cu Gobierno ta huur na un prijs exorbitante? E no a realiza cu Gobierno ta bira doño di tur e instalacionnan na momento cu e financiamento ser honra completamente, o sea den algun aña? E tin algo personal contra e desaroyador? Contra e tata di e desaroyador? Pasobra e proyecto no ta di mi, manera hopi hende ta pensa, sino di mi yiu. Claro cu como tata mi ta para su tras, pero mi no por tuma credito pa algo cu mi no a haci, y tampoco ta husto pa mi tuma e critica, aunke nunca algun critica a yega di molostiami.

                Di cu e proyecto tIn un margen di ganashi cu e desaroyador ta haya ta husto pa su labornan y inversionnan cu el a haci pa crea un proyecto di tal magnitud y tal balor? Claro cu si. Mescos cu e autonan cu Juan David ta bende den su negoshi tin un margen di ganashi basta halto, cualke otro ciudadano tambe tin e mesun derecho di incorpora den su prijs e margen cu e ta haya ta hustifica tur e trabao y placa cu el a inverti den dje. Hopi viahe pa Merca, reunionnan na diferente Estadonan Americano, y estudionan paga na ingenieronan y tecniconan pa crea e modulonan cu ta sirbi nos enseñanza tin un balor inherente na e proposicion haci na Gobierno.

                  Awor Juan David kier pa e proyecto bay den un licitacion publico, despues cu ya tur hende conoce e costonan envolvi, e diseño di modulonan, y otro factornan cu en realidad mester a keda priva pasobra no ta Gobierno a paga pa nan, sino e desaroyador, por ta pasobra Juan David kier aparenta un transparencia cu mi no a mira den hopi otro proyecto ehecuta pa su Gobierno. Ey e tabata completamente mudo! Pero, Juan David ta insisti riba un licitacion publico pa e structuranan modular, apesar di lo inhusto cu e ta bay ta pa e desaroyador di e proyecto.

                 E ta haya cu e postura cuestionable aki ta parti di su labornan como un Parlamentario? Ta masha bunita cu e kier kibra cu e molde di Parlamentonan someti na e boluntad di e Gobierno di turno, pero perhudicando un comerciante cu a haci su best pa ofrece un solucion practico y ehecutable na Gobierno no ta parcemi e ruta adecuado pa demostra esey.

                 Ken ta bay sali gana di e confrontacion aki cu Juan David a provoca pasobra e kier ta mas papista cu Papa di Roma? Con e por a hinca den su cabez cu un Gobierno mester traha segun dogmanan doctrinario, siendo cu flexibilidad pe ta lo pragmatico y deseable? Si e tira un bista ronde di dje y mira loke ta pasando na mundo, e lo a compronde for di basta tempo caba cu dogma den cuestionnan di Gobierno, lo a conduci caba na fin di mundo.

                Si Merca a mantene su mes dogmatico referente Rusia den e guera frio, awe nos tur lo ta victima di un guera nuclear devastador; y si Rusia a mantene su mes dogmatico den e instalacion di misilnan na Cuba, por ta cu ningun di nos lo ta bibo pa conta e historia con flexibilidad a triunfa riba dogma den e arena politico.

                Mi tin entendi cu Juan David ta cana papia rond cu awor DIARIO ta MEP pasobra e doño no a haya loke e tabata kier di e Gobierno di AVP. Pa su informacion, DIARIO ni su doño a yega di haya NET NET NADA di cualke Gobierno o partido cu a sinta den Gobierno. Nos ta un medio independiente, cu si ta kere den flexibilidad y ta mantene nos mes leu di dogmanan di comportacion o politica interno di e matutino di Pueblo. Nos ta aki pa sirbi Pueblo, no pa indoctrine den cosnan cu ta linea recta contra loke ta pragmatico y viable. Nos a demostra esey den hopi ocasion, y lo sigui mantene nos mes na decisionnan di momento, basa riba loke e realidad cu ta biba rond di nos ta indica. Nos a keda como e number 1 den circulacion pasobra Pueblo sa cu nos ta existi pa defende loke ta di dje, no di cualke Gobierno o partido.

                 Ora cu nan desvia nos ta dispuesto di bisa nan, y ora cu nos mester cambia di opinion riba un partido o Gobierno nos ta dispuesto di hacie, pasobra bobo ta esun cu nunca ta cambia di opinion, apesar di ta confronta cu hechonan irefutable; sabi ta esun cu sa adapta su mes na e circumstancianan cu a cambia.

- Advertisement -

DUNA COMENTARIO

Please enter your comment!
Please enter your name here