Home General Por Tin Aumento Di Prijs A Consecuencia Di Pensioen Obligatorio

Por Tin Aumento Di Prijs A Consecuencia Di Pensioen Obligatorio

9
0
SHARE
- Advertisement -

Leo Maduro KvK

Pero por tin otro factornan

Recientemente a keda firma e pensioen obligatorio cu ta e di dos pilar di pensioen banda di esun di biehez. Tur gremio participante na e dialogo social a firma e protocol of acuerdo aki. Nos a sinta cu Leo mduro di Camara di Comercio e consecuencia cu esaki lo por tin na momento cu e pensioen aki keda introduci.

Segun Leo Maduro, esaki lo tin como consecuencia cu comercio lo cobra esaki bek den aumento di prijsnan. E pensioen tin consecuencia pa tanto dunador di trabao como e trahador. Cada compania na Aruba ta obliga pa paga parti den realisacion di e aseguro di pensioen aki , pues sera un acuerdo cu un coampania di seguro. E trahador tambe tur luna ta paga su contribucion na e seguro di pensioen aki pa ora cu e yega na edad di pensioen of momento cu e retira for di mercado laboral, e por haya banda di su pensioen di biehez un di dos entrada.

E asugor di pensioen aki lo drenta na vigor dia 1 di january 2012, na unda cu tanto e dunador di trabao como e trahador lo mester aporta 1%.

E contribucion lo wordo aumenta na 2013 na 2% cada partido, mientras cu na 2014 cada partido lo contribui cada un cu 3%, cu ta bira total 6%. 

Pa cada trahador cu ta den servicio e doño di trabao mester acumula e suma y si e trahador cambia di empleo e suma acumula lo keda y e dunador di trabao nobo lo sigui contribui. Esaki a wordo inclui den e ley cu proximamente cu bay parlamento. A inclui un areglo pa traspasa e fondo di e empleado encuestion pa asina e fondo di pensioen di dje sigui crece y e por contribui sin ningun tipo di problema.  Pues e issue aki a keda satisfactoriamente aregla. Mester por tin tambe un control debido riba con e traspaso ta tuma lugar pa e trahador tin su fondo sin ningun problema.

Peso di pensioen obligatorio

 

Leo Maduro di Camara di Comercio a duna di conoce cu a bin constata cu e AOV, no ta suficiente entrada pa garantisa un existencia minimo. Mester ta garantisa esaki pa asina e pensionado por hiba un bida bon. A dicidi di bin cu un otro forma di pensioen banda di e pensioen di AOV, esaki pa motibo cu e sistema di pensioen di AOV aki ta un sistema di “pay as you go system”. Kiko esaki kiermeen ta cu actualmente e contribucion di tanto trahador y dunador di trabao ta bay como pago of ta cubri pensioen di esnan cu tin pensioen, pues esnan cu ta 60 aña bay ariba actualmente.

E diferencia entre e areglo di pensioen di AOV y esun obligatorio ta, cu loke e contribucion ta, esaki ta haya. Dus e ta depende di e haltura di e salario pa haya bek como e suma di pensioen ora cu yega na edad di pensioen. Tin opcion pa esnan cu a yega edad di pensioen sinembargo kier sigui den e proceso laboral, lo por sigui contribui na e fondo aki te ora cu e dicidi di bay cu pensioen. Pues esun cu salario halto lo haya mas cu ta haci cu no por cambia e realidad di bida aki, Maduro a remarca.

Loke ta recomendabel pa haci ta cu banda di e 3% cu e dunador di trabao y trahador lo aporta, cu e trahador por aporta un poco mas si e ta desea. E contribucion cu ta sali for di e dunador di trabao pa su empleadonan ta sali for di productividad di e empresa. Actualmente tin cierto presion pa aumenta salario minimo, mientras na inicio di aña den dialogo social a aproba aumento di AZV di 1% tanto pa e trahador como dunador di trabao. E gastonan di labor ta hopi halto tambe, esaki ta haci cu e loonwig , cu ta e diferencia entre salario bruto y salario netto, awor aki ta mas cu 34% caba. Gobierno a aumenta e plafond di e premie di AOV den e acuerdo di dialogo social na cuminsamento di aña cu ta costa mas placa. E loonbelasting ta substancial caba cu ta haci cu a yega na e punto cu no por aumenta nada mas. Tur e aumentonan aki ta haci cu ta na caminda pa yega 40% di salario bruto. Esaki ta un peso hopi grandi pa motibo cu Aruba mester competi den un region caminda unda mester compara Aruba cu Punta Cana y no cu Hulanda. Na Republica dominicana e salario minimo ta alrededor di US$ 150,00. e salario minimo di Aruba ta X cantidad e salario minimo aki y door di aumento di e primanan encuestion esaki a sigui bay halto. “Nos mester ta hopi conciente cu e areglo nobo di pensioen aki ta brinda e trahador e oportunidad pa spaar pa su biehez. Esaki ta trece un responsabilidad di e trahador pa exigi su doño di trabao pa sigui aporta na e fondo di pensioen aki.

Por paga mas na contribucion?

Segun Leo maduro cu esaki ta posibel si e doño di trabao kier aporta mas of tin un CAO cu sindicato y ta papia di mas porcentahe, esaki ta posibel tambe. Si e trahador riba su mes kier aporta mas, esaki por tambe. E 3% ta e minimo cu ta obliga pa aporta na e fondo, e por ta cu e dunador di trabao por paga 4% y e trahador 2%, pues e areglo d pensioen aki ta uno flexibel. Tin varios posibilidad y escenario cu por aporta na e fondo aki.

Consecuencia di introduccion di e pensioen obligatorio

Posibelmente lo bay tin aumento di prijs di producto y servicio a consecuencia di introduccion di e pensioen obligatorio. Sinembargo tin otro factor tambe, por ehemplo tin empresa cu no kier aumenta prijs pa miedo di haya menos cliente, of por garantise cierto entrada. Pesey e ta hopi importante pa hisa e productividad na Aruba. Kisas por haci e mesun trabao cu menos empleado, pero tin empresa pa aumenta nan productividad mester di mas trahador. Den hopi ramo por mira cu e organisacion den trabao por mihor, na unda cu por logra mas eficiencia den esaki. Pues haci mas trabao cu menos esfuerzo cu tin como resultado mas ganashi, cu ta haci cu tin mas pa parti of na benificio pa e trahador. Esaki ta haci cu ta bira mas facil pa por cumpli cu pago di e pensioen aki tambe.   Esaki ta hopi necesario mirando cu e productividad durante e ultimo decadanan ta bay atras gradualmente. Mester remarca cu productividad den diferente sectornan no por wordo interpreta mescos, manera bisa caba cu tin sector mester di mas trahador pa logra esaki mientras den otro sector cu menos trahador por yega na mas eficiencia tambe. Por ehemplo si tin 5 hende den oficina, esaki kisas por wordo reduci na 4 y reparti e trabao entre e 4 trahadornan cu a keda. Den e sector hotelero esaki lo ta diferente y mester kisas di mas trahador pa duna mihor servicio y hisa eficiencia.

- Advertisement -

DUNA COMENTARIO

Please enter your comment!
Please enter your name here