Home General Posiblemente tin cosnan robez pasando den WEB Aruba NV cu ta costando...

Posiblemente tin cosnan robez pasando den WEB Aruba NV cu ta costando pueblo miyones

11
0
SHARE
- Advertisement -

Kico ta pasando den WEB?
Wärtsilä ta haci erornan y gerencia di WEB ta bay di acuerdo pa paga pa nan eror
ORANJESTAD (AAN): Puitonan a cuminza sali for di macuto! DIARIO ta hayando informacion di cierto cosnan den WEB cu mester di atencion y claridad rapido. Hopi cos parce kier pa worde scondi pero na dado momento e berdad mester sali. WEB Aruba NV ta un compania estatal y pueblo ta su doño. Cosnan scondi cu ta pasa den WEB no por keda secreto pa gobierno y sigur pa pueblo. Na fin di aña pasa WEB Aruba tabata tin un fayo y daño mayor na e crankshaft na un di nan motor nobo (RECIP), (uno di e seisnan) E fayo ta e resultado di algun empleado cu mente malgino den WEB mes cu a duna permiso pa e fabricante di e motor “Wärtsilä” por experimenta cu un diseño di bearing nobo riba motor di WEB!!


Loke ta worde cuestiona ta dikon un compania multi biyonario cu tin nan mesun plantanan cu motor di e mes un tipo cu WEB tin na Aruba, ta bin te Aruba pa experimenta cu nos motornan!! Algo asina por sosode solamente si tin hende riba lista di pago y compensacion di e fabricante di e motornan.

Resultado ta cu WEB Aruba tabata tin un motor fuera di servicio mas cu ocho luna representando un perdida di produccjon di mas cu dos miyon Florin y mas cu un miyon y mey di daño mecanico na e motor.

Y e compania “Wärtsilä” tabata tin papel y contrato firma door di e empleado gerencial dudoso unda Wärtsilä ta responsable solamente pa mitar di e dañonan di material. Ainda no por compronde con nos propio empleadonan di WEB formando parti di gerencia por acepta culpabilidad di mitar di e daño cu un experimento cu Wärtsilä mes a comete 100%.

E mensahero y promotor principal pa Wärtsilä na WEB Aruba NV mes a core rond buscando participante pa firma e areglo benificioso pa Wärtsilä y asina por haci experimento cu nos motornan.

Awor ken ta paga tur e dañonan? WEB Aruba naturalmente! E fabricante di motor “Wärtsilä” a rectifica e crankshaft door di slijp esaki na un medida mas abou, y despues di menos cu un luna di operacion e crankshaft a krak y no ta sirbi mas! Parce cu e crankshaft a kibra net prome cu weekend. Otro daño mayor pa WEB Aruba NV.

Esaki por nifica un biaha mas ahustacion cu ta subimento di prijs pa nos utilidadnan!! Ken ta paga? Nos cu ta e pueblo naturalmente. Wärtsilä ta proef riba nos motornan y awor pueblo mester carga e costonan cu ta 750 mil Dollar djis pa e crankshaft. Wärtsilä prome cu e haci proef konijn riba e motor na Aruba a logra pone nos mesun hendenan firma pa carga mitar di e costonan pa nan mesun eror.

E cosnan aki ta solamente posibel ora cu tin cierto areglo entre empleadonan dudoso di WEB Aruba NV mes y e fabricante di motor Wärtsilä. A bira tempo pa bin un investigacion pa castiga e culpable nan di e robo cu nan a comete contra pueblo Aubano door di nan erornan premedita of concientemente.

DIARIO ta hayando informacion cu na WEB tin te hasta listanan di firma di esnan cu awe a forma parti di complicidad hunto cu Wärtsilä pa tuma sea pago of regalonan di e fabricante di e motornan cu WEB a cumpra. E actuacionnan dudoso aki ta netamente loke a pone cu Wärtsilä por te hasta yega na corumpi cu nos mesun hendenan.

Loke a pasa aki ta demostrando caba cu algo ta hopi robez bezig den WEB. Gobierno mester habri su wowo y rapidamente. Wärtsilä no por bin Aruba pa experimenta cu nos motornan y ora haci eror nos mesun hendenan den WEB ta bay di acuerdo pa cubri gastonan di mas cu miyon Florin.

Nos pueblo no por sigui wanta e cosnan aki mas. A yega ora pa trece un reorganizacion den WEB y urgente poniendo empleadonan mas responsable. Ta bon pa sa si gerencia di WEB a notifica gobierno di e asunto aki pasobra aparentemente nan a mantene nan mes masha keto…

- Advertisement -

DUNA COMENTARIO

Please enter your comment!
Please enter your name here