Segun Minister Otmar Oduber:
ORANJESTAD (AAN) — Dialuna a worde trata den Parlamento e presupuesto di ATA Sui Generis. Den entrevista cu Minister Otmar Oduber, el a splica cu manera cu ley ta prescribi, prome cu 1 September e presupuesto a worde entrega na e Hunta di Comisario di ATA SG. E mandatario a splica cu e presupuesto aki ta worde manda, naturalmente, na su persona y diez dia prome cu e aproba esaki, e mester ta na Parlamento pa e por haya input, kiermen e comentarionan di miembronan di Staten.
Minister Otmar Oduber a bisa cu aunke e ta un tiki laat mester tin indulgencia pa cu Parlamento, den sentido cu e reunion aki mester a tuma lugar dentro di e diez dianan cu el manda e presupuesto pa Staten, mirando cu ta e prome aña cu nan ta experiencia e proceso nobo aki.
E mandatario a subraya cu e mes no a aproba e presupuesto ainda manera ley ta stipula pa hacie despues di diez dia, pa hiba un discusion cu Staten, cu segun Minister Otmar Oduber a trece hopi clarificacion riba hopi punto, unda cu e mandatario a mustra cu ATA falta un faceta ainda, esta di crea un base legal loke tabata e linea cora den e reunion aki.
E mandatario a anuncia cu den e presupuesto di Aruba lo no tin mas contribucion pa ATA Sui Generis, kiermen e ta financieramente totalmente independiente, y un noticia positivo cu e dignatario a haya ta e cifranan di September ultimo, y cu gobierno a caba di ricibi, cu ta mustra un crecimento di 9.55 porciento cu ta nifica den e nuebe lunanan aki, un porcentahe di 6.90%, cu ta un incremento di mas cu doble di loke a worde pronostica pa 2011.
Minister Otmar Oduber a declara cu e forma con e discusion a tuma lugar, hopi habri pa cu ATA, e no a existi pa e ultimo binti añanan, unda a entrega un plan di mercadeo na Parlamento, tres luna prome cu aña a termina, y un presupuesto hopi transparente, hasta a papia riba e diferente actividadnan cu ATA ta organiza, con por envolve Parlamento pa duna nan opinion door di haci diferente estudio y ATA mes mirando cu nan ta inverti mas cu 3 miyon Florin den e diferente eventonan aki, a pone un clausula den e contratonan cu lo haci un evaluacion cada aña, independiente di si tin un contrato di un of cinco aña, y a base di e evaluacion aki lo dicidi si sigui of no cu e contrato.
Parlamento a expresa di ta satisfecho cu esey, y muy probablemente nan lo kier un mocion tambe pa continua den e direccion aki cu ta bon bini cerca ATA tambe. El a reitera cu e reunion aki a bay cu basta clarificacion, mirando e documento cu nan a manda Parlamento hopi adelanta.
