Promer Minister tabatin e honor di cende e luznan cu ta ilumina nomber di nos aeropuerto y logo di Aruba
ORANJESTAD (AAN): Diaranson anochi durante ceremonia di cendemento di luznan di nomber di aeropuerto, esta Aeropuerto Internacional Reina Beatrix, y tambe logo di Aruba, Promer Minister Mike Eman a duna di conoce cu nos isla ta uno hopi special.
“Un isla cu memei di e mundo turbuleto, cu hopi problema y hopi reto, tin registra e aña aki un crecemento di 10%, un crecemento cu ta unico den nos region. E ta danki na e empeño cu nos tur ta haciendo riba e baranca aki”, Promer Minister a duna di conoce.
Dunando algun ehempel, el a menciona empeño riba tereno economico, riba turismo, riba tereno social, riba tereno di politica y politica den Reino Hulandes. El a pone enfasis riba e ultimo, pasobra si no ta pa e mehoracion di e relacionnan den Reino Hulandes, awe no lo ta papiando cu KLM a regresa Aruba y aumento di esakinan.
Pesey cu honor, el a bisa cu ta cende e luznan cu ta bay ilumina e nomber di nos aeropuerto y logo di Aruba.
Despues di e palabranan aki, Promer Minister acompaña pa su coleganan Otmar Oduber y Edwin Abath y tambe director di aeropuerto, Peter Steinmetz a cende e luznan iluminando asina e air side di nos aeropuerto.
