Sindicato ta confirma cu Elmar ta bai corta mas di 9000 meter di coriente
Segun partido MEP:
ORANJESTAD(AAN)– Patrtido MEP a emiti un comunicado den cual a menciona cu den un programa radial den fin di siman sindicato di Elmar a confirma e hecho cu Elmar a contrata un contratista pa corta miles di meter di coriente. Esaki pasobra tin un cantidad record di meter pa bai corta, un cantidad nunca antes bisto y Elmar mes no por cu tur e trabao ey. Esaki ta confirma publicacionnan cu a sali den medionan di comunicacion y cu Elmar pa medio di sra. Wanda Broeksma, cu e mes ta gana riba 10 mil florin pa luna, a purba di sconde pa pueblo. Pero Elmar a lubida cu ningun mentira, ni con bon e ta, no ta keda scondi pa semper, pasobra e berdad ta alcanse.
Segun MEP, esaki ta otro prueba mas cu hopi famia den nos comunidad ta pasando den momentonan dificil financieramente. E cantidad di hende cu no por paga nan hipoteca ta alarmante. E cantidad di casnan na findishi tur siman ta creciendo drasticamente. Y riba dje awor casi 10 mil famia cu no por paga coriente, ta bai perde nan meter.
Tambe a sali na cla cu gobierno a mete den Elmar ora kier a corta e meter di un hende hopi yega na AVP, y mesora a reconecta su meter. Lamentablemente pa resto di Aruba no tin e trato preferencial aki.
MEP ta bai hasi preguntanan oficial na gobierno pasobra hustamente awor cu supuestamente a introduci un tarifa social, e ta hincando tanto hende den problema cu pago di nan cuenta. Tur hende nan recibo a subi drasticamente cu e tarifa “social” aki. Tur indicacion ta cu e malgastamento di placa di Elmar y di Utilities awor ta wordo poni riba e recibo di nos famianan. Y no lubida tur e peso di e “Europe House”, ta pesey e tarifanan a subi, indudablemente. En todo caso di “social” e tarifa aki no tin net net nada!
Tambe MEP lo hala atencion di gobierno relaciona cu e hecho cu ya ta lagun luna cu MEP a pasa un mocion, unanime, den Parlamento, dunando gobierno e instruccion pa elimina for di e brandstof clausule, tur locual no tin di haber cu ‘brandstof’, pasobra e sospecho ta cu eyden Elmar ta sconde tur sorto di gasto, manera e Europe House, e Green Conference, e bonusnan halto pa miembronan di directie, pa asina pueblo ta esun cu ta paga nan. Esaki ta un situacion inaceptable, y ta tempo pa gobierno bin duna cuenta na Parlamento!
