Su Mahestad Reina Beatrix ta nos compas den Reino
Segun ministro Otmar Oduber:
ORANJESTAD(AAN):– E tabata un berdadero fiesta riba Linear Park diabierna ultimo durante e Fiesta Cultural organisa pa e bishita na Aruba di su Mahestad Reina Beatrix, Prins Willem Alexander y Princes Maxima. Minister encarga Otmar Oduber a haya e honor di splica e delegacion di henter e proyecto di Linear Park y kico ta e idea tras di e Fiesta Cultural. Un presentacion cu su Mahestad a disfruta masha hopi di dje mirando e integracion di e diferente nacionalidadnan bibando na Aruba.
Loke cu a yena e publico grandi, cu a acudi na Linear Park ,cu orguyo, ta cu Su Mahestad no a sconde su alegria di ta na Aruba y hasta a dirigi su mes na e publico pa algun minuut despues cu Minister Presidente Eman a expresa di e amor grandi cu Aruba tin pa Cas Real, principalmente Su Mahestad kende e ta considera e compas di Reino.
Famia Real hunto cu su delegacion a yega Parke Linear den bus y pasa na cada un di e standnan di e Fiesta Cultural pa admira e cultura di e colonianan residencia na Aruba. E mandatario den su discurso a referi na un discurso cu La Reina tabatin algun aña atras den cuadro di celebracion di Pasco. Na e ocasion ey Su Mahestad a papia di cierto aspectonan di sociedad cu ta bay perdi, e comprension pa otro. Por ehempel e ayudo cu tabata existi entre bisiñanan.
E solidarismo cu otro tabata haci cu tur hende tabata conoce otro, algo cu no tey mas awendia. Tur esaki Su Mahestad a expresa den su discurso y ta algo cu e Prome Mandatario di Aruba tambe ta sinti.
A base di esaki, el a elogia e manera cu La Reina ta trata di trece e hendenan hunto bek. “Su Mahestad ta para pa amor pa ser humano y solidaridad.” Eman a bisa cu La Reina ta e compas na caminda pa solidaridad y tolerencia. Cu mester na Aruba tambe, Premier Eman a bisa.
Tambe na inicio el a menciona e gran persona cu Prins Claus tabata. Despues cu Premier Eman a entrega La Reina un mascara luhoso pa final di e Fiesta Cultural dedica na Famia Real, Su Mahestad a tuma e microfono pa bisa cu “semper ta un fiesta pa ta bek na Aruba”.
Su Mahestad a agrega “nos ta sinti nos mes na cas aki na Aruba,” el a bisa esaki den nomber tambe di su yiu y su nuera. Prome Minister Eman a dirigi su mes na “Nuestra Princesa Maxima” na Spaño pa entregue e mascarada luhoso.
Tabata un berdadero sorpresa na final, ora cu tanto Su Mahestad, Prins Willem Alexander como Princesa Maxima a acepta e invitacion pa bailando riba ritmo di brassband bay direccion di nan bus hunto cu Prome Minister Eman y Minister Otmar Oduber.
