Si corte superior dicidi cu Giordano mester bay bek den detencion, Aruba lo pidi Merca pa su extradicion

Publication: Wednesday, 30 November 2011. Categoria: General

ORANJESTAD (AAN): Diamars Abogado General Taco Stein a duna un conferencia di prensa como vocero di Ministerio Publico pa loke ta trata e caso di desaparicion di e Mericano Robyn Gardner.
Durante e conferencia di prensa, Stein a bisa cu Diamars mes e sospechoso principal Gary Giordano a worde laga den libertad, despues di a sinta 30 dia mas den detencion preventivo.
Siman pasa fiscal a pidi un prolongacion di detencion pa e sospechoso di 30 dia mas, pero e huez a rechaza e peticion.
Motibo di pidi pa un prolongacion di detencion ta e hecho cu Giordano sigur lo bandona nos isla, e caso a shock comunidad, e seriedad di e caso y e hecho cu Giordano lo por afecta e investigacion di e Sali liber.

Como cu e fiscal ta haya cu tin suficiente motibo pa tene e sospechoso mas largo, el a apela decision di e huez den corte superior.

Awe Corte Superior lo scucha e caso di apelacion y di biaha nan lo duna nan veredicto.
Si duna un orden nobo di detencion, Ministerio Publico di Aruba ta bay pidi Merca extradicion di Giordano.

Dilanti un grupo grandi di prensa Mericano, Stein a splica tambe algun di e diferencianan entre e sistema legal di Merca y esun di Hulanda cu ta worde uza na Aruba.

Entre otro el a indica cu na Aruba y Hulanda no ta uza e sistema di ‘bayl’, unda cu un sospechoso por paga cierto suma determina pa un huez, pa e Sali liber, pendiente di tratamento di su caso.
Stein a sigui bisa cu si corte superior dicta cu Giordano por worde cera back of no, e caso no a termina aki.

“Señor Giordano lo keda nos sospechoso principal”, segun Stein.
Stein a mustra tambe riba e hecho cu nos sistema ta pone cu pa cuminza un huicio contra un persona, tur e evidencia mester ta cla pa por haci esaki.

El a indica cu den e caso aki O.M no a yega na e punto aki ainda.
Segun e abogado general, si e caso di Giordano bin dilanti den un huicio awor, muy probablemente e lo Sali liber di tur acusacion.

“Nos ta determina di sigui cu e investigacion y nos kier sa kico a pasa cu Robyn”.
“No solamente pa sirbi husticia, sino tambe pa famia y amigonan di e muher Mericano haya contesta riba locual a sosode, despues cu nan ser keri a desaparece dia 2 di Augustus”.
Esaki segun Stein, kende a sigui bisa cu specialmente mirando cu dianan di fiesta cu ta bin, esaki mester ta extra dificil pa e famia.

Leave a Reply