A ground avion Venezolano despues cu el a baha riba taxi way na lugar di pista oficial
ORANJESTAD(AAN):– Un avion Venezolano cu matricula YV-1177 a haci un aterizahe na un lugar robez.
E por tabata un desaster si a resulta cu otro avion tabata biniendo pa subi pista. E avion aki tabata biniendo for di Venezuela y a bai baha mainta trempan. E momento ey solo tabata saliendo.
El a baha pega cu e waya panort net caminda cu normalmente un avion ta bin direccion pabao.
Ta hopi straño cu algo asina por sosode pasobra claramente por mira cu e pista pa subi y baha ta net pazuid di e taxi way.
Por distingui facilmente un pista y un taxiway.
E pista for di cualkier distancia por wordo mira pasobra e tin tambe e marcanan di avionnan cu ta mishi tera.
E storia di piloto cu solo a dal den cara ta algo intragable pa aviacion civil di Aruba. Den pasado algo similar a yega di sosode caba y e piloto mester a responde seriamente pa e acto cu el a haci.
Mescos un biaha un otro avion Air Ambulance a baha na Palo Marga y aki e piloto a haya un multa di 1000 florin cu mester a wordo paga prome cu bandona Aruba.
A ground e avion Venezolano YV-1177 cu a baha na e taxiway diabierna mainta. Loke tambe ta cuestionable ta e actuacion di toren di control.
Nan tin un responsabilidad di tin bon bista riba avionnan cu ta acercando pista. Nan mester a notifica e piloto cu e ta riba rumbo robez.
Aki mester tabata tin un lepiamento formal door di toren. Ademas di vigila e aterizahe di e avion mester mira cu e tren di aterizahe ta afor.
Ora e mishi tera mester marca e ora exacto cu el a touch down.
Awor cu e avion Embraer a baha riba e taxiway nifica cu e atencion di esnan den toren mester por tabata un otro caminda y no riba e avion bahando e momento ey.
co ta conoci kiko lo sosode cu e avion y cuanto lo dura pa nan por kita e beslag cu e avion tin riba dje.
