Home Editorial Independencia?

Independencia?

1
3
SHARE
- Advertisement -

              Mi no por keda sin sinti mi mes asombra cu te ainda tin algun hende ta core tras di e ilusion di Independencia comosifuera e ta algo deseable o bon pa Aruba. Den ki forma cu bo mire, e ta lo ultimo cu nos tin mester pa purba sali di e debaclenan economico cu e ultimo dos Gobiernonan a crea. Ademas, bo mester ta hopi ingenuo pa kere cu mara na cualke otro pais (excepto Merca) cosnan lo ta miho pa nos den algun sentido. Nos no tin nada di gana cu un pasaporte Arubiano, y menos ainda cu un nacionalidad di e mesun tipo. Como Hulandes nos ta goza di respet, y como viahero nos pasaporte Hulandes-Europeo ta duna nos un prestigio cu masha poco di nos lo kier perde pa sinta kere cu den un Independencia progreso lo hari cu nos y acompaña nos den nos viahenan pa exterior. Arubiano nos ta for di e momento cu nos nace, y Arubiano nos ta keda, pero esey ta un pahra di otro plumahe cu nacionalidad o pasporte.
               Ta dificil compronde bon kico a tuma lugar na Hulanda, unda nos politiconan a bay hunga sabi y a termina demostrando un solo cos cu un claridad absoluto: e poco union cu tin na Aruba. Ora cu ta trata di asuntonan di esencial importancia pa nos bida comun, o sea como Pueblo, e miho carta di presentacion cu nos por mustra ta un union grandi pa loke ta trata e futuro di nos isla. Al fin y al cabo, ta nos tur mester biba cu e resultadonan di cualke decision cu por afecta o altera nos relacionnan actual cu Hulanda, y via e, cu Europa. Y ta net esey tabata ausente durante e deliberacionnan ayanan. Pasado ta yen di les pa siña for di nan, pero ta poco kier tuma e molester di studia nan y saca conclusionnan valedero di nan. Si a djis corda con Betico a hala mara cu tur otro instancia na Aruba prome cu el a bay enfrenta Hulanda, con el a haci paz cu otro partidonan politico, a cera alianza cu comercio, sindicato y clero, lo tabata obvio e caminda cu mester a cana prome cu a bay Hulanda bay presenta un espectaculo deprimente.

             Berdad ta cu den pasado e lucha di MEP tabata pa e independencia di Aruba, loke a resulta tambe den e logro di Status Aparte, pero mara na un independencia indeseable 10 aña despues, y cu a ser hancra den Statuto. Pero, pa duna Cesar loke ta di Cesar, ta e Gobierno di MEP mes di e tempo aya a logra scrap e fecha di independencia for di Statuto y a duna mas firmeza na e Status Aparte cu nos a logra na final di tur e confrontacionnan. Un Status Aparte cu despues a cuminza perde parti di su importancia durante añanan largo di tornumento na dje, y cu a lague practicamente como un skelet di loke un tempo e tabata.

             Cualke encuesta na Aruba lo demostra sin ningun duda cu e mayoria absoluto di e Pueblo no ta partidario di un eventual independencia, y ta desea di keda cu e status cu nos tin awor, o sea parti di Reino, y via Hulanda, di Europa. Ban laga aventuranan yen di riesgo pa otronan menos pensante cu nos, y ban consolida e relacionnan amigal cu nos tin cu Hulanda. A bay nos bon cune durante mas di 400 aña, y mi no ta mira pakico esey mester cambia awor. Ambicion pa poder no por tuma prioridad nunca riba e bienestar di e mayoria di nos Pueblo, y ta na dje e politiconan mester dedica nan mes un poco mas, na lugar di pleita den patio aheno manera gaynan di pelea.
       
               Nos tin hopi problema pa soluciona, y cu confrontacionan infructuoso nos no ta bay logre. Ya Evelyn a declara caba cu MEP no ta interesa den independencia, no ta papiando mas di dje, y e no ta mira tampoco pakico mester sigui cu e topico ey. Mi ta di acuerdo cune. Tin hopi otro cos mas urgente pa atende.

- Advertisement -

3 COMMENTS

  1. Alfin un hende a bin dilanti cu e articulo cu twt mester pa esunan pro-independencia pensa un tiki, con ta posibel cu tin arubiano cu tan sikiera por pensa over di e desaster di idea pa un independiencia, cual pais nos lo por bishita cun paspoort cu no ta europeo sin mester roga pa un visa??, Cual pais ta bai habri porta pa nos hubentud por bai hasi nan opleiding na un nivel asina halto manera nos ta orgulloso di por disfruta di dje awe na hulanda y ademas ofrece nos posibilidadnan di lening, mi kemen di!!! Un tiki logica ta loke falta den e tiki persona ney cu por pensa den algo cu lo afecta nos pais asina hopi!! Danki pa e Hopi Bon Articulo!

  2. Un persona abnormal so no kier independencia di nan pais, independencia politico tur isla o nacion por obtene, independencia economico ni esun di mas poderoso di planeta, pa loque ta trata paspoort esaki no ta nada importante, importante ta e money cu bo mester tin pa biaha, aki na Aruba mes tin un cantidad espantoso di hende cu nunca a yega di subi avion y e poconan cu ta biaha ta kisas uno of tres biaha den nan bida. Asina ta ami si ta kere 100% den independencia di mi isla, ya nos no tin cu biba loke otro tin cu kauw pa nos.

  3. No pa menciona ….ariba cua base di impuesto ….riba 100 mil persona ///bo ta bai paga …bo mes defensa …defensa aero …defensa naval …embajada na pais importatnte (lesa MILLONES den huur y personal) …di unda e placa ei ta bai sali …mi no ta kere cu hende razonable por pensa cu Aruba tin sufficiente base economico pa inependiza …y cubre tur e gastonan cu ta bin cune…FINACIARAMENTE E SIMPLEMENTE NO TA POSIBEL ..PA ARUBA bira INDEPENDIENTE ..IT IS A PIPE DREAM ..let us get REAL//// ami ta hopi contentu cu mi nacionalidad Hulandes y tur e beneficionnan cu ta mara na dje…envez di distancia nos di Hulanda mester busca acerca nos mas …..

DUNA COMENTARIO

Please enter your comment!
Please enter your name here