JCI Aruba a celebra en grande su 50 anja
ORANJESTAD(AAN)– Recientemente JCI Aruba a celebra 50 aña di existencia.
E evento aki a tuma luga den e prestigioso palo di coco restaurant di Holiday Inn hotel caminda a instala e bestuur nobo pa 2012.
E anochi aki a cuminsa prome cu e parti oficial, caminda a hiba palabra senator Arondino Croes y tambe JCI Vice President Dave Martinus. Ambos a comparti nan experiencia den JCI y tambe a trece palabranan di motivacion .Despues a sigui cu un reconocimento special na tur presidente cu a presidi JCI Aruba durante e ultimo 50 añanan. Tambe JCI Aruba tabatin e honor di tin e anochi ey presencia di señor Bernardo Christiaans. Señor Christiaans a forma parti di e prome bestuur di JCI Aruba cu a wordo funda na aña 1961.
A sigui despues cu instalamento di e bestuur pa 2012, cu ta consisti di e siguiente miembronan:
Omira Abath – Presidente; Loufran Tromp – Secretaria; Aldrin Maduro – Tesorero y Roslyn Croes – Presidente Pasado.
Despues di e parti oficial, tur esnan presente por a disfruta di un dushi dinner y a baila te den oranan di madruga riba e ritmo di Perfect Sound.
JCI Aruba kier a gradici tur su partnernan cu a contribui pa e ultimo 50 añanan: TEC NV, Victoria Bottling, CMB y muy especialmente Banco di Caribe cu e aña aki tabata e sponsor principal di e exitoso Empowerment Seminar cu a wordo organiza den e luna di Augustus y cu a gana e best fundraising program award na e annual JCI Dutch Caribbean National Convention.
JCI ta un organizacion rond mundo y cu tin como meta pa duna tur joven entre 18 y 40 anja e oportunidad pa desarolla su mes y pa asina por contribui cu un cambio positivo pa su comunidad.
