Na porta di aña 2012, mi mehor deseonan pa henter pueblo!
Pa Mercedes A.H-Monge
ORANJESTAD(AAN):Nos ta yegando na e ultimo trapi di Aña 2011, y habrimento di porta pa 2012 drenta den nos pais, den nos hogarnan, den nos bida.
Hopi ta wordo bisa cu e aña cu ta bin lo ta uno mas dificil cu esun cu nos lo yama ayo, sinembargo, tambe ta ser bisa cu den temponan dificil e sernan humano ta bira mas creativo pa traha riba su mes progreso y bienestar.
Nos no mester lubida cu si nos tin FE den Dios, e mehor di e Tatanan, nos no mester tin temor pero si ta asina cu nos mester duna di nos mes tambe, y lucha duro pa logra nos metanan, pasobra nada bo ta haya gratis, tur cos ta costa tempo, energia y sacrificio.
Na porta di Aña Nobo, mi kier a desea henter pueblo di Aruba un feliz habrimento di Aña 2012, cu Dios drama su bendicion na un y tur.
Mi ta probecha pa desea mi coleganan di DIARIO, y nos doñonan di trabao famia Mansur, hopi felicidad tambe, no solamente ora aña ta habri y cu nan lanta nan copa pa brinda den famia, pero pa henter Aña 2012 lo trece exito y abundancia spiritual, material pa tur, y e mehor noticianan pa nos comunidad pa medio di nos Matutino di Pueblo.
