Sindicato di Maestro di Aruba SIMAR cu mensahe na tur esnan den enseñansa
Un Felis y prospero aña 2012.
ORANJESTAD(AAN): “Apreciabel coleganan den e mundo di enseñansa, specialmente abo, miembro di nos sindicato.
Na prome lugar directiva di SIMAR ta desea cada un di boso un felis y prospero aña 2012, yen di dicha, salud, amor, sabiduria, alegria y properidad.
SIMAR a cera aña 2011 cu diferente logro importante, entre otro a tuma lugar Dialogo social riba enseñansa y seguridad, comicion cu a traha riba restructuracion salarial a entrega nan trabao y esaki awor ta den man di KPMG pa e siguiente paso, a firma protocol di pensioen y tambe di indexering. Tambe comicion di seguridad a entrega un manifiesto cu puntonan importante cu gobierno lo mester bay para keto na nan entorno seguridad den enseñansa, specialmente di docentenan.
E mundo di enseñansa a haya hopi atencion pa motibo di e atencion cu SIMAR ta duna na e desaroyonan cu a tuma lugar. Pero mas cu claro nos ta lew fey cas. Tin hopi puntonan di atencion importante cu ta preocupa nos tur.
Entre otro introduccion di ley di enseñansa obligatorio, cual na opinion di SIMAR no a worde trata debidamente. Nos tur mester ta hopi conciente di e desaroyonan aki, ya cu ta nos, esnan den candela ta esnan cu lo carga e consecuencianan. SIMAR ta kere cu un di e metanan di un pais mester ta di tin educacion optimal pa su hendenan. Pa nos logra esaki nos mester ta mas uni, mas atento, mas conciente y mas habierto. Educacion ta parti importante di desaroyo di un pais. Analisis a demostra cu 70% di Aruba ta na nivel di LBO/MBO. Esey ta demostra cu un caminda nos mester trece cambio. E responsabilidad ta den man di tur e actornan cu tin di haci cu e desaroyo den enseñansa. Nos docentenan ta esnan cu tin e reto di mas grandi. Y pesey nos mester bay traha na e cambionan necesario na nan bienestar den e aña venidero.
Durante aña 2011 SIMAR a pasa door di cambionan grandi. Entre otro nos a conoce un directiva nobo cu un presidente y vice-presidente nobo. Pa prome biaha den su historia, SIMAR ta bou liderasgo di dos hende mohe.
Directiva a organiza diferente charla. Un hopi bon bishita tabata esun “bo stabilidad emotional ta den bo man”. Tabata tin 3 charla mas cualnan lamentablemente tabata bishita door di masha poco docente. Nos lo bay sondea ta kico ta e motibonan y con nos por soluciona esakinan, pa miembronan ta mas imbolucra cu nan sindicato.
E actividadnan social, mane semper, tabata bon organiza y bon bishita.
Den 2012 SIMAR tin trabaonan pendiente. Nos lo cuminsa cu reuni cu minister di enseñansa pa trata con nos ta sigui cana riba restructuracion salarial. Nos tin casonan canando cu asina cu aña habri lo yega corte cu ta trata mal “inschaling” di docente y sigur SIMAR lo sigui riba tur esnan cu ta pendiente. Tambe nos lo bay haci nos maximo esfuerso pa e docentenan cu tin e necesidad, por haya guia profecional pa problemanan di trabao/ personal den SIMAR. Directiva lo sigui sinta cu directivanan di school, cual a cuminsa den 2011 y a resulta hopi positivo. Tambe lo cuminsa bishita docentenan den school mes. E meta ta pa yega mas cerca di docentenan y stimula un mihor relacion cu SIMAR.
Un comicion ya ta trahando duru pa den 2012 SIMAR por tin su reglanan di cas tambe cla.
Directiva lo cuminsa e prome fase di SIMAR su patio. Nos a tene cuenta cu e peticion di miembronan, pues e patio fuera di lo bira un lugar pa organiza fiesta, lo bira un centro multi-funcional caminda nan tambe por bin pa ratonan ameno y social cu coleganan. Tambe e cancha pa hunga beach-volleyball/ basket lo bira un realidad. Meta final lo ta pa april cu su apertura cu un festival di canto pa maestro.
Por ultimo directiva kier recorda tur su miembronan riba un reunion general dia 5 di januari (no keda sin pasa busca bo hard-copie cu informacion hopi importante di e punto di agenda principal desde dia 2 di januari na oficina) y tambe riba e brindis di aña nobo cual lo tuma lugar diabierna venidero, 6 di januari 2012 di 8:00 pm pa 12:00 am na cede di SIMAR cu musica di “Rincon Boys”. Corda cu esnan cu trece un miembro nobo y/of bira miembro e anochi aki lo haya un sorpresa y pa tur miembro lo tin un regalo. Por fabor presenta na porta cu bo carnet of un identificacion. (No-miembro mester paga pa drenta).
Felis aña 2012!
