Diadomingo awor tin Concierto Dominical cu musica Cubano
ORANJESTAD(AAN)– Diadomigo awor, dia 29 di januari 2012 Fundacion pa Talento Musical “Donny Laclé” ta presenta un biaha mas su Concierto Dominical, su concierto di tur fin di luna.
E concierto aki ta existi 12 aña caba y ta masha popular. Manera semper e concierto aki ta tuma luga den “The French Steak House” di Manchebo Beach Resort & Spa, di 11.00 or di mainta te 01.00 or di merdia. Diadomingo awor nos tin un programa hopi varia atrobe:
Beatriz Santanas Yánez & Ramón Riverón Colina ta habri e concierto y nan lo laga e publico Arubiano disfruta di nan musica Cubano, cu guitara y canto, cu semper ta un sorpresa di calidad.
Trio Wonderful cu ta consisti di tres hoben talentoso, esta Xandro Hooker (trompet), Xandre Hooker (saxofon), Eric Richardson (trompet) ta sigui y lo toca algun gospel instrumental.
Tomás González, cantante y guitarista, lo percura pa e di tres presentacion den e concierto aki. E lo percura pa algun cancion romantico Latino Americano.
Tipico Alegre Cadushi Largo bou di direccion di Andres Werleman lo clausura y lo trece tur hende den un ambiente di fiesta crioyo.
E comision organizado ta invita pueblo henter pa bin pasa un mainta alegre y sano cu bon musica.
Entrada ta gratis, pero manera semper ta pidi un contribucion pa nos hobennan talentoso.
Sea asina bon di bini trempan, no solamente pasobra e concierto ta cuminsa 11.00 or en punto, sino tambe pa haya un bon luga pa sinta y pa no perde nada di e concierto aki.
