Diario Online

El a declara di tin nada di haber cu kimamento di booth na Shete

Publication: Saturday, 28 January 2012. Categoria: General

Madi Kock no ta give up:
ORANJESTAD (AAN) – DIARIO a acerca señora Madi Kock, ken manera ta conoci tin hopi aña ta duna guia na turistanan cu ta bishita e area di Arikok y alrededor y ta hiba nan Conchi, como parti di e ruta cu e ta core dunando e servicio na turistanan.
Diamars Madi a haya su mes cu presencia di polis, y diaranzon unda cu e booth cu tin situa na Shete, dilanti e lugar unda su mayornan ta bende cierto articulonan, a cende na candela, ademas cu tabata tin destruccion y cadena ranca.
Madi a duna di conoce cu el a worde poni na haltura door di su mama, y a duel’e kico a pasa pasobra a causa polucion y pasobra hopi hende a pensa cu e no mester a sosode pasobra candela ta nifica protesta, y no mester haci esey den un lugar asina bunita di Aruba, cu ta perde su encanto ora e bira problema.
E dama a comenta cu si tin problema y e ta kere cu 99.99 porciento di e poblacion di Aruba ta pensa mescos cune cu no ta bon pa awor bin violencia riba nos Isla, un pais unda tur hende sa cu nos comunidad ta hopi pacifico, pero tin hende cu ta excita pa algo sea grandi of chikito mes.

El a relata cu e tabata na e cas unda e tabata biba prome na Santa Lucia, cu el a bay busca un dak pa pone den su negoshi chikito na Shete.

El a mustra hopi disgusta pasobra polis no a papia na bon manera cune. El a splica cu siman pasa un park ranger a puntre si e tin un pas pa pasa door di e caminda cu ta cera, y el a bise cu si pasobra e tin un acuerdo cu el a firma cu Booshi Curiel.

El a bay back na un situacion cu el a pasa aden algun siman atras, cu su amigo Mike Eman tambe a bin wak e situacion y nan a cana pa Conchi.

Despues un bulldozer a bin, cu e no sa ken a mande, nan a fix e caminda, loke nunca antes nan a haci, nan a drecha e caminda per awor awacero a dañe, pero el a costa pueblo hopi placa.

El a bolbe referi na un palo a worde movi y Parlamento y Arikok a cay aden cu no ta un watapana cu ta na bida, cu por cierto un docter di Fantastic Garden a bin wak e, cu awor ta director di Arikok cu e ta supone cu su salario ta bon.

El a sigui bisa cu despues cu el a pasa cu su hendenan, el a haya un mensahe cu nan a manda pe via un amigo di parke cu a bise di e situacion, manera cu e mester sali di e parke pasobra e no a drenta bon.

Madi Kock a bisa cu e tin cu bay rondea den file, of papia cu Booshi puntre di e acuerdo, cu cual e mes no ta di acuerdo, pero cu e tine.

Tres dia pasa, el a conta, cuatro hende a bay Conchi, nan a paga na parke 8 dollar pa persona y nan a bay. Un ora y mey largo nan a cana y no a yega Conchi debi na awacero, anto nan a bin back atrobe a tarda un ora y mey, kiermen a tuma tres ora sin cu nan a logra di yega Conchi pasobra e ta leu.

Madi a remarca cu nan mester stop di haci abuso contra e turistanan. E ta un defensor di turista y e ta bay pone esaki preto cu blanco, pasobra polis mes a bise pa laga Minister pone preto riba blanco cu e tin permiso y pa nan lague traha.

Madi a subraya cu no ta e a crea e candela, y cu tin hopi hende malcontento na Aruba y kizas un a hacie, pero e no sa. Mester puntra ken a hacie, y tambe puntra pueblo di Aruba si nan ta contento cu henter e sistema di Parke Arikok. El a comenta cu mehor a traha un hospital envez di inverti miyones den e parke.

El a expresa tambe cu sr. Maduro a bise cu e mester bay KIA pasobra el a menciona e palabra corupto y esaki ta ora bo ta tuma algo di un hende sin pidie, y e ta haya cu den tur signature of color politico ora nan ta sinta, no esnan cu ta na cabes ni mas abao, pero meymey tin hende cu ta bin haci cosnan robes.

Madi no ta di acuerdo cu Minister Winklaar a nombra Roy Maduro como director di PNA. E ta mire como un hende cu tin suficiente edad pa bay sosega na su cas, planta flor, y no pensa cu Parke ta bira Fantastic Garden.

 El a expresa cu cabrito mester di mata y mata mester di cabrito.
El a agrega cu no ta asina cu e no kier paga pa drenta den e parke. Madi no ta gusta e palabra “paga” e ta haya cu mester mire como un contribucion cu e parke y e kier contribui tambe pero loke e ta kere cu e cartera di hende por paga.

Segun Mati e trahadornan di PNA falta caracter pa pidi un reunion cu Mike su amigo, y cu e minister encarga, y pidi nan puntra den pueblo kico nos hendenan kier, pasobra ningun hende ta doño di nada.

El a bisa tambe cu e turistanan kier bay Conchi, y cu si nan mandanan pa bay via Shete, nan ta tarda un ora y nan por bebe awa di coco pa haya forza pa e canamento. E turistanan a haya bon informacion durante e 19 añanan cu Madi ta traha, y a haci bon propaganda pa e lugar di locual e ta sinti su mes orguyso.

El a yuda e turistanan hopi y cu amor, entre otro el a cambia tire, a saca hende cu a keda pega, a auxilia hopi hende cu w.c y gratis, y e balor aki tin cu wak.
Madi ta bay sigui cu su lucha te ora e sistema cambia, cu tin manera pa hacie, segun el a expresa, envez di lague asina pa capricho.

Segun’e e turista no ta spera nada. Nan no ta spera cu nan mester bay haci nan necesidad tras di piedra, pa nan barica no bira los, tampoco di topa riba caminda cu sushi di cabay, of olanan grandi cu tin biaha nan no por hinca ni un dede den Conchi.

Madi a mira hopi tours masha grandi yega, dos luna pasa, cu a gana hopi dollar anto e turistanan no por a drenta Conchi. El a subraya cu hendenan ta kere cu Conchi ta algo magico. Pero ta esnan trahando den turismo pa añanan a hacie magico, y tur hende ta guste pasobra e ta di nos tur.

Madi a remarca cu e ta unico hende muher cu ta pasa e caminda ey pa Conchi y cu e no tin miedo di nada. Loke e kier ta pa drecha e sistema y e ta bay traha un carta di protesta y e no ta hibando turistanan manera semper pa Conchi.

E ta perdiendo placa y haciendo un sorto di daño na su mes, segun el a expresa, pero e ta convenci cu e lo gana for di dje. El a haya sa cu e park rangernan a worde bisa cu si nan ta laga Madi pasa, nan ta kite for di trabao y tur esaki door di un persona.