Entrante 1 di januari 2013 Douane lo ta los di SIAD
Minister Mike de Meza a revela
ORANJESTAD(AAN): Cuerpo di Douane ta di fiesta cu celebracion internacional di Dia di Douane. Relaciona cu esaki a logra entrevista cu minister Mike de Meza kende tabata presente durante e evento di santo sacrificio di misa. Despues a sali un marcha tambe cu douaneronan direccion Renaissance na momento cu e mandatario a caba di inspecciona e peloton di Douane. Minister di Finanza, y kende ta encarga cu departamento di Douane, a felicita tur e miembronan di e cuerpo aki y tambe esnan cu a labora den pasado den e funcion aki.
“E trabao di Douanero ta conoci di ta hopi grandi pa Aruba, no solamente pa e entrada, pero tambe pa vigilancia di frontera,. Su bida tur momento ta na peliger. E tin cu percura cu nada straño of ilegal ta tuma luga na e frontera di Aruba.
Y pa ningun producto ilegal drenta territorio di Aruba. Un trabao di integradidad y di hopi seriedad,” e mandatario a duna di conoce. Cuerpo di Douane ta celebrando 25 aña di existencia.
Pa cual e mandatario tabata masha contento di e exito cu e cuerpo a logra den e un kwart siglo di existencia den pais Aruba. Despues di e marcha, tabata tin un brunch na Renaissance Resort, caminda e mandatario a participa tambe.
Miembronan trahando den cuerpo di Douane ta carga e speranza cu gobierno aki si lo trece cierto cambionan cu semper nan tabata anhela. Den combersacion cu minister Mike de Meza a mustre riba e deseonan aki cual ta e los koppeling for di SIAD y tambe bay back na uza e sistema di Asycuda, cualnan sigur, nan ta kere, lo yuda pa un mihor maneho di Cuerpo di Aduana den su totalidad.
E mandatario a mustra cu e ta consciente di e deseonan aki y cu den Conseho di ministronan a discuti cu lo traha hopi ora pa keda cla cu e pakete total di e separacion di Douane entrante 1 di januari, 2013.
Esaki ta nifica c unan lo tin nan propio director cu ta raporta na e Minister di Finanzas. Di e manera aki nan por concentra riba nan trabao na un manera mas efectivo posible. Gobierno ya caba a haci un estudio riba e sistema di informacion di Douane cu tabata tin den pasado y a stop cune.
E mandatario a expresa di ta lamenta cu a stop di uza e sistema aki cual ta uno cu a bini cune door di Nacionnan Uni, pa Douaneronan. E ta specificamente traha pa e Cuerpo aki, pero cu a worde para na 2002.
Casi tur pais ta uza e programa aki cu ta uno masha efectivo. Minister de Meza a bisa cu ya caba el a firma e contracto pa haya e Asycuda World, cual ta e version mas nobo di e software aki. Esaki ta encera cu lo mester cumpra computer nobo y duna entrenamento tanto na personal di Douane como e companianan cu ta importa y exporta di Aruba.
Entre e plannan di Gobierno ta pa cumpra mas di e cachonan specialisa pa detecta ilegalidad, droga. Lo cuminsa cu entrenamento pa e personal di Douane cu lo bay atende cu e cachonnan. Ademas cu nan por duna entrenamento despues na nan coleganan.
Otro aspecto cu lo re-introduci ta e entrenamento di tiro. Hopi miembro di Douane tin basta tempo sin haya e entrenamentonan necesario riba e tereno aki. Principalmente si yega un momento cu nan mester protege nan mes y nan coleganan, nan mester ta bon prepara.
Minister de Meza ta convenci di lo logra e plannan pa separa Cuerpo di Douane for di SIAD, y cu den esaki tin e apoyo y aprobacion di Sindicato di Aduana, cu Semper a boga pa e cambionan. Y tambe casi tur e Douaneronan ta di acuerdo. Pesey ya caba ta den combersacion cu SIAD.
