Joran van der Sloot a declara su mes culpable di mata Stephany Flores

Publication: Thursday, 12 January 2012. Categoria: General

PERU: Joran van der Sloot a declara su mes culpable Diaranzon, pa asesinato di Stephany Flores di 21 aña di Peru.  E asesinato na Peru a tuma lugar na 2010, exactamente 5 aña despues di desaparicion di Natalee Holloway for di Aruba, pa cual van der Sloot tambe tabata e sospechoso principal. “Si mi kier declara mi mes culpable”. “For di prome momento mi kier a confesa sinceramente”, el a bisa corte. “Di berdad mi ta lamenta loke a sosode y mi ta sinti mi mes hopi malo”.
Esaki segun e Hulandes dilanti di un panel di 3 huez, kendenan a bisa cu sentencia lo ta Diabierna caba.
Van der Sloot por haya te cu 30 aña di castigo pa asesinato di e hoben Peruano, pero e motibo pa declara su mes culpable ta pa wak si e por haya un castigo menos halto.
Van der Sloot su abogado den corte a bisa cu Joran a mata Stephany door di un trauma psicologico extremo.
E lo a sufri di tur e circunstancia y hechonan relaciona cu e caso di desaparicion di Natalee Holloway for di Aruba na 2005.

Fiscalnan a exigi un castigo di 30 aña pa asesinato di prome categoria, mientras cu defensa di Joran ta boga ma homicidio, di cual e castigo minimo ta 5 aña.

Joran net despues cu el a worde deteni a bisa cu el a mata Stephany door cu el a rabia ora cu e mucha muher den laptop di Joran a descubri e conexion di Joran den desaparicion di Natalee Holoway.
Fiscalnan sinembargo a acusa e Hulandes di asesina Stephany pa por horta su placa for di dje.

One Response to 'Joran van der Sloot a declara su mes culpable di mata Stephany Flores'

  1. January 12, 2012 at 7:15 am
    kay quijada

Leave a Reply