Joran van der Sloot condena na 28 aña di prison

Publication: Saturday, 14 January 2012. Categoria: General

*e Hulandes a indica cu e ta keda cu e derecho di apela
ORANJETAD(AAN)– Diabierna Joran van der Sloot a wordo condena na 28 aña di prison, pa asesinato di Stephany Flores. Ta te den zomer di 2038 e lo por Sali di prison, despues di cual e lo wordo deporta. Banda di esaki Joran tin cu paga famia di Stephany 58.000 Euro.
Fiscal a exigi un castigo di 30 aña.
Di biaha despues di e sentencia, Joran a indica cu e ta keda cu e derecho di apela sentencia di huez.
Remarcable tabata e cantidad di tempo cu a dura pa lesa e sentencia.
Esaki a dura mas di 1 ora y mey, mientras cu un traductor tabata traduci esaki pa e Hulandes.
Joran tabata mustra tenso, mientras cu mas y mas e tabata soda.
Na dado momento el a haya permiso pa scucha e resto di e sentencia sinta.
Sinembargo na momento cu e huez a lesa e veredicto, Joran tabata mustra trankil.

‘Joran a strangula e victima di 21 aña riba 30 di Mei 2010 den su camber di hotel’.
‘Van der Sloot a declara anteriormente cu el a rabia ora cu Stephany tabata wak articulonan tocante di Natalee Holloway riba su laptop’.

Segun e huez, Joran a actua sin motibo y por a papia di un asesinato bastante cruel.
‘Joran a actua na un manera calcula y no a mustra respet pa bida di Flores’.
Asina e veredicto a bisa.

Huez a remarca si cu el a tene na cuenta cu Joran a admiti cu el a asesina e mucha muher.
Apesar di esaki, e Hulandes a haya solamente un descuento hopi chikito riba e cantidad di tempo cu e tin cu sinta den prison, mirando cu e no a admiti e asesinato for di un principio.

Despues cu Joran Sali, tin un otro caso pendiente contra dje na Merca, esta extorsion di mama di Natalee.
E lo a pidi e mama 250.000 dollar, pa bise unda e curpa di Natalee lo tabata.

Leave a Reply