Mas cu mitar di aumento di salario a bay pa belasting!
Tanto bal cu a paga indexering:
ORANJESTAD (AAN) – Manera ta conoci diamars cu a pasa empleadonan publico a cobra nan salario, cual a inclui e adaptacion di indexering di 140 florin. Pero ironia di bida, segun varios reaccion cu DIARIO a haya di empleadonan, nan no a bay ni un stap dilanti, pasobra 80 florin a bay pa pago di impuesto! Kiermen locual nan ta haya den man di e 140 florin aki aki, ta practicamente nada, nan no ta resolve ningun problema di costo di bida cu 60 florin!
Conociendo e sistema di impuesto cu nos pais tin, hopi ta e ambtenaarnan cu ta haya cu no bal la pena pa bringa mas pa indexering, y cu locual gobierno mester haci ta baha e costo di awa, luz, y e amplia e canasta basico, cu ta un promesa cu gobierno a haci pero te ainda no a cumpli.
Contrario na esaki e prijs di azeta pa cushina cu ta parti di e canasta basico a aumenta cu mas cu un florin. Gobierno no a pone aviso riba esaki, pero e consumidor si ta mire den reki di tur supermercado.
Of gobierno mester cambia e sistema di paga belasting pa hacie mas husto pa e pueblo, pasobra nan ta kita placa di cada cachi cachi cu un trahador por haya extra, hasta si nan ta bende nan vacacion cu nan mesun doño di trabao, locual ta un inhusticia total.
Cu otro palabra, e ambtenaarnan a keda masha decepciona di mira con nan pago di impuesto a subi djis pa 140 florin di indexering, y na final di dia e situacion a keda mes dificil pa un y tur!
