Polis a evita cu Dominicano a mata un hoben
Tiro a sona na Eagle Beach!
ORANJESTAD (AAN): Un caso serio a keda registra Diadomingo anochi, net algun meter panort di e actividad di Flip Flop cu a bay basta bon e anochi ey riba Eagle Beach. Tur esaki a socede debi na un ice-jug! Dos homber cu tabata cargando dos Ice-jug, tabata bayendo bek nan vehiculo pa asina bandona e actividad. Nan a yega na un parti mey-mey di e matanan, unda tin un hanchi chikito pa pasa. Aki tabatin un pareha sinta. E hombernan a pidi dos biaha dispensa pa nan pasa cu e dos Ice-Jug. Ora cu e pareha sinta riba e pilarnan no a reacciona, e hombernan a hisa e dos Jugnan den halto pa pasa numa.
Esaki ta unda e conflicto a start.
E homber sinta cu no kier a hala, a resulta di ta un Dominicano. El a lanta para y a cuminza pusta boca cu e dos hombernan cargando e Ice-Jug. Mesora nan a pone esakinan abao, y a contesta bisando e Dominicano cu na dos ocasion nan a pidi “dispensa”, pero e no a worry cu nan.
Aki e discusion a cuminza bira mas intenso, y diripiente e Dominicano a djis rek un careda core bay zuid.
Tur esaki a socede den bista di un patruya di Polis cu tabata acercando.
E Dominicano cu a core bay, lo a bay busca un Machete, y mesora a cruza caya y na un forma scondi a yega bek di trinshon riba e dos hombernan cu e machete y menaza nan.
Despues el a pone e machete na e garganta di un di e hombernan.
Esey ta ora cu Polis a core baha di nan patruya y yega cerca. Un di e polisnan a grita e homber pa e tira e machete na suela. E orden no a yuda!
Na e momento ey polis a wak e Dominicano hisa e machete na halto pa aparentemente pa ataca y baha e arma peligroso riba un di e dos hombernan. Cu rapidez pa evita un drama polis a saca su pistol reglamentario, y keto bay dunando orden ripiti pa e benta e machete abao, e agente a los un tiro di advertencia den laira.
E tiro di advertencia tabata tin su efecto ya cu consecuentemente e Dominicano porfin a benta e machete mesora na suela. Na mesun momento polis a detene e homber pa intento di asesinato cu arma.
E machete a worde confisca como evidencia Locual ta e dos otro hombernan nan a worde recomenda pa pasa na Recherche entrega denuncia official. E sospechoso a worde hiba warda y na aki el a ser presenta dilanti Fiscal Auxiliar. El a atende y e ta esun kende a ordena pa tene relaciona cu e investigacion.
