Porcentahe di hendenan cu ta stuur auto bao influencia di alcohol a subi drasticamente
Inspector Ricardo Muller:
ORANJESTAD (AAN) – Hefe di Departamento di Trafico, Inspector Ricardo Muller, a splica den conferencia di prensa reciente tocante seguridad den trafico, cu na Aruba ta usando e mesun sistema di Hulanda, pa midi e cantidad di alcohol cu un chofer tin den su curpa na momento di stuur auto. E sistema aki ta esun di 0.5 mg di alcohol den e persona su organismo, cu ta worde getest via di su rosea, unda e ta supla den un machine ora cu polis ta ripara cu e ta bao influencia.
A base di esaki polis ta haya un resultado tentativo, e persona ta worde hiba na warda di polis y despues ta presenta dilanti sub fiscal.
E ora ey e ta pasa un test via un machine mas grandi, cu ta duna un resultado mas précis di cuanto ta e grado di alcohol cu e tin den su sistema.
A base di esaki e sub fiscal ta dicidi si e persona ta keda deteni of si e ta bay cas, y a base di e resultado di e machine grandi Ministerio Publico ta dicidi si nan ta retene su rijbewijs y pa cuanto tempo of caso ta bay dilanti Huez, ken ta duna sentencia.
Inspector Muller a subraya cu polis ta constata cu tin un abuso enorme di consumo di alcohol, unda cu hopi persona ta bebe y despues ta bay core auto tog, y e porcentahe di e casonan a subi drasticamente.
Inspector Ricardo Muller a agrega cu e control ta bay sigui cu enfoke grandi riba consumo di alcohol, y ta bay bin cu hopi programa pa concientiza e personanan cu ta haci uso di vehiculonan di motor, pa si nan sa cu nan ta bay bebe alcohol y nan ta core auto, pa busca un persona pa stuur pa nan, of no core auto mes.
