Home General Promer Minister Mike Eman ta representa Reino na instalacion di presidente di...

Promer Minister Mike Eman ta representa Reino na instalacion di presidente di Nicaragua

0
0
SHARE
- Advertisement -

ORANJESTAD (AAN): Aceptando un invitacion di Ministro di Relacionnan Exterior, sr. Uri Rosenthal, Prome Minister di Aruba, Mike Eman lo dirigi e delegacion di Reino Hulandes cu ta participa na e ceremonia di huramentacion di Presidente di Nicaragua, Daniel Ortega Saavedra.
Tras di su re-eleccion dia 6 di november ultimo, Daniel Ortega lo sirbi un periodo nobo, despues cu el a asumi presidencia di e pais centroamericano na 2007.


Prome Minister Mike Eman tin e honor pa dirigi e delegacion oficial di Reino Hulandes, cu ta consisti tambe di Prome Minister di Curaçao, Gerrit Schotte, y e encargado di Reino na Managua, Reina Buijs.

Na su yegada na e aeropuerto di e ciudad capital di Nicaragua, Managua, Prome Minister Mike Eman y su delegacion ta worde ricibi pa un representacion oficial di Presidente Ortega, como tambe pa funcionarionan di e Direccion di Protocolo di e Ministerio di Relacionnan Exterior di e pais.

Adicional na e actonan protocolar, cu ta forma parti di e ceremonia di huramentacion di Presidente Daniel Ortega, Prome Minister Mike Eman lo haci uso di estadia di otro dignitarionan di paisnan bisiña, pa sostene reunionnan bilateral cu ta worde considera di particular interes pa Aruba.

Dor di Aruba su posicion strategico y e promocion di Aruba como “Gateway” di Americas pa Europa y di Europa pa Americas e interes pa Aruba den region ta creciendo. Durante su ultimo reunionnan na Hulanda, Promer Minister Mike Eman a palabra cu Minister di Economia di Hulanda, Maxime Verhagen, cu na mei proximo lo organiza na Aruba un encuentro grandi cu e tema “Europe meets Americas”.

Empresarionan di Hulanda y Europa lo worde invita pa bin Aruba pa topa cu partnernan strategico potencial for di Americas y e region, cu lo worde invita pa bin Aruba cu e proposito pa topa potencial partnernan strategico di Europa.

E evento aki lo ta un di e promernan cu lo duna contenido na e acuerdo di cooperacion entre Aruba y Hulanda cu e proposito pa Aruba desaroya su mes como un “Gateway” entre Americas y Europa.

Na Nicaragua Prome Minister Mike Eman lo promove e posicion aki cu Aruba ta desaroyando y e evento specifico cu ta habri oportunidad pa hopi pais den region. Den e mesun cuadro aki ta trahando tambe riba e facilidad di un “Pre-Clearance” pa Union Europeo na Aruba den e forma cu Aruba tin caba pa Merca. Esaki tambe lo haci Aruba extra atractivo pa paisnan den region.

E balor adicional di Aruba su posicion den region, cu relacion special cu Reino y Aruba, lo resalta como un punto atractivo pa hopi pais den region cu ta aspira mas relacion cu Reino y Union Europeo en general.

Pa Aruba un vez mas e hecho cu nos tin un posicion excepcional cu nos relacion cu Reino lo resalta tambe cu e hecho cu Prome Minister Mike Eman di Aruba ta encabesa e delegacion di Reino na un ocasion asina special.

- Advertisement -

DUNA COMENTARIO

Please enter your comment!
Please enter your name here