Stop di tira piedra sconde man, estilo di “cauchi baulo”
Mervin dirigi na fraccion di MEP y Evelyn:
ORANJESTAD(AAN): Mervin Wyatt-Ras durante conferencia di prensa a reacciona ariba un articulo cu a sali den diferente medio di comunicacion skirbi door di fraccion di Mep. Mervin tin sospecho si ken ta skirbi e articulo. Tambe tin cu menciona cu tin varios articulo ta sali bao diferente capa manera di fraccion, di opinion publico y hasta militancia. E persona cu ta manda esakinan ta sconde tras di otro nomber pa e difama Mervin. Esta e ta tira piedra sconde man.
Den e articulo menciona ta bay asina leu den cuestiona capacidad y experencia di Mervin. Tur esaki paso mep ta haya cu nan no tin representacion den grupo di trabao Salud.
Mervin kier splica pueblo kico ta e caso.
Na St. Maarten durante e reunion entre e paisnan nobo den Reino, Hulanda y Aruba, durante cu tabata trata e topico di Salubridad a palabra cu Mervin lo atende cu esaki na Aruba y lo ta “trekker” of cabesante di un Grupo di Trabao di e diferente paisnan pa yega na cooperacion ariba e tereno aki.
Pakico a pidi Mervin ta cu Mervin ta presidente di e comision di Salud na Aruba y Mervin a prepara loke a ser presenta door di delegacion di Aruba ariba e topico di Salubridad.
Na Aruba promer cu a bay St. Maarten durante preparacion di e topiconan cu a ser trata a apunta Mervin pa skirbi un stuk encuanto esaki.
Miembronan di MEP mescos cu otro parlamentarionan tambe a haya un tarea y tur a bay di acuerdo. A lo menos nan no a protesta. Pues pa haci e trabao si nan a haya Mervin bon. Ora cu na St. Maarten e nomber di Mervin a ser menciona señora Evelyn Wever-Croes a lanta bula manera algo a pike pa bay zundra e presidente di CIPRES di Aruba sr. Herde. Obviamente e tin asina rabia ariba Mervin cu e no por a contene su mes. Straño ta pakico e no a protesta na Aruba.
Mervin ta comenta cu ya diferente integrante di fraccion di MEP y ex-lider a yame pa tur sorto di nomber y awor cu e tin falta di capacidad y falta di experencia.
Mervin ta spera djies MEP ta purba bin cu calumnia y baho pa purba di kibre of kibra e bon nomber cu e tin den comunidad.
Mervin cu tin 10 aña den Parlamento y a fungi ya caba entre 2001 te 2005 como presidente di e comision di salubridad y tabata presidente di parlamento y awor atrobe ta presidente di e comision anto diripente e no tin experencia y e mester ta un dokter pe haci e trabao. Esaki ta bay contra di loke e partido a haci den pasado.
Tabatin un minister di Salubridad pa 8 aña di e partido cu no tabata dokter. Kizas Evelyn ta pensa cu door cu e por a drenta MEP y bira lider den menos cu 2 aña cu tur hende ta mesun nobato cune.
Mervin ta kere cu trahando duro bo ta logra metanan y no door di favoritismo, ni grita na radio ni skirbi articulonan baho sin pone bo nomber.
En bista cu dr. Kelly ta e remplasante di e comision, Mervin ta anhela di por traha hunto cu ne. E ta spera cu e otronan di MEP no trata di influencia Kelly negativo pa e no traha hunto.
Paso al fin loke ta importante den Parlamento ta scucha nos pueblo y transmiti esaki den trabao. Mervin ta considera cu traha den e grupo di trabao aki e no ta hacie den nomber di Mervin, ni di mep, ni di avp, ni di Evelyn sino den nomber di pueblo di Aruba.
Mervin ta haya cu skirbi articulo mahos denigrante no ta trabao cu mester ser haci como parlamentario di e mundo moderno siglo 21, scucha pueblo, bin reunion pa defende interes di pueblo, participa y duna contribucion. Mester stop di tira piedra sconde man al estilo di “cauchi baulo”.
