Tram ta diseña specialmente pa Aruba y ta core riba batería
ORANJESTAD (AAN): Gabinete Mike Eman ta trahando di forma acelera pa finalisa tur e proyectonan cu a worde priminti na pueblo di Aruba. Proyectonan cu ta nifica un cambio completo di e producto Aruba. Un di e proyectonan cu ta forma parti di e plan integral ta renobacion di Centro di Oranjestad, combina cu e uzo di tram, cu ta transporta principalmente turistanan crucero. No solamente pa inicio di caya pero te na final. Yegada di e railnan ta un etapa importante pa e proyecto di caya grandi. Segun Minister di Infrastructura a splica ayera mainta na waf, e gunning di instalacion di railnnan a tuma luga, y e compania cu a gana esaki tabata MNO Vervat, cu ya caba ta realisa diferente proyecto aki na Aruba.
Gobierno ta spera den un luna di tempo e ekiponan pisa pa instalación di railnan lo yega for di Hulanda y trabaonan por cuminsa. Caya grandi actualmente ta completamente cera y por a nota cu tin trabaonan andando na e ultimo parti di caya grandi.
Segun e mandatario, den algun siman por bisa cu e trabaonan di bou tera ta finalisa. Den e próximo simannan ta bay tin destaho publico pa e “streetscape”, esta matanan, gazebo, paradanan di e tram (8), cu ta percura pa un bon fluho.
E tram ta percura cu e turista, na cualkier parada cu e baha, sa tur loke cu tin e bisindario ey pa bishita of pa haci compras. Ta mara henter e área den un línea, cual lo worde haci door di e tram.
Ta masha hopi trabao a bin ta worde haci bou di tera den caya, pa sigura cu pa e próximo 20 añanan of mas, no mester coba y kibra e cayanan di centro mas.
E parti di e proyecto di tram pa caya grandi lo mester ta cla den seis pa shete luna, pero sigur pa december awor henter e proyecto mester ta pa bay den ehecucion.
Minister Sevinger a splica cu tram, anteriormente no tabata conoci na Aruba. Esaki ta nifica cu mester bay haci adaptación den leynan di trafico, cual huristanan ta studiando esaki. Of lo mester bini cu un ley nobo.
Pa loke ta maneho di e tram, Minister Sevinger a bisa cu asina e proyecto ta cla completamente, e lo worde entrega na e Minister di Transporte, sr. Otmar Oduber.
Probablemente Arubus lo bay opera e tram. A traha caba un “visibility report” cu ta papia di unda e placa pa mantención di e tram lo bini, unda su garashi lo bay ta (banda unda antes tabata DOW). BID ta e organización cu ta bay maneha caya principal y bisindario. Nan oficina lo ta situa banda edificio di Nick Habibe.
E tram di Aruba ta diferente cu esun di Hulanda. Esun aki ta tram core hopi menos, 8 kilometer pa ora, e ta habri. E ta diseña specialmente pa Aruba, ta core riba batería y no tin cabel ariba. Lo haci uzo di solo of biento pa crea energía pa e batería.
John Dante
wel wel esaki si ta un cos. e ta habri y ora awa jobe tur hende ta muha hahaha
aki un par di anja ta ken lo corda cu tabata tin un tram na Aruba.